سوتتان تىس بانروتتىق ءراسىمى كەزىندە تىركەلگەن ادامداردىڭ 70 پايىزىنىڭ ءوتىنىشى نە سەبەپتى كەرى قايتارىلدى؟
بۇل تۋرالى قارجى ۆيسە-مينيسترى ەرجان ءبىرجانوۆ ايتىپ بەردى، دەپ حابارلايدى Almaty-akshamy.kz.
«قازىرگى كەزدە 49 مىڭنان استام ءوتىنىش كەلىپ ءتۇستى. ونىڭ 36 مىڭى كەرى قايتارىلدى. 6 مىڭ ءوتىنىشتى قابىلداپ ۇلگەردىك، جارتى جىلدىڭ ىشىندە ولار بانكروت دەپ تانىلۋى مۇمكىن. كەيبىر وتىنىمدەر ءالى دە قارالىپ جاتىر، ويتكەنى ءوتىنىش 15 جۇمىس كۇنى ىشىندە قارالادى»، - دەدى ە. ءبىرجانوۆ سەناتتا تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، وتىنىشتەردى كەرى قايتارۋدىڭ نەگىزگى سەبەبى سوتتان تىس بانكروتتىق راسىمىنە قاتىستى بولىپ تۇر. اتاپ ايتقاندا، ءوتىنىش بەرگەن ادامداردىڭ قارىزى شەكتى سوما 1600 اەك-تەن اسىپ وتىر. تاعى ءبىر ماسەلە، كەيبىر ءوتىنىش بەرۋشىلەر جارتىلاي بانكروتقا وتكىسى كەلەدى، ياعني يپوتەكا بويىنشا كەرەديتىن تولەپ جاتقانى انىقتالدى. كوپ جاعدايدا ءوتىنىش بەرگەن ادامداردىڭ مەنشىگىندە مۇلىك، اۆتوكولىك، جەر ۋچاسكەلەرى بار ەكەنى بەلگىلى بولدى. وسى دەرەكتەر سوتتان تىس بانروتتىقتى راسىمدەۋ كەزىندە انىقتالدى.
ۆيسە-مينيستر وتىنىشتەردى كەرى قايتارۋ قالىپتى جاعداي ەكەنىن جانە بۇل كورسەتكىش 70 پايىزدى قۇراعانىن ايتتى. ءتيىستى زاڭدى ازىرلەۋ كەزىندە حالىقارالىق تاجىريبە، سونىڭ ىشىندە باتىس ەلدەرىندەگى تالاپتار زەرتتەلگەن.
«اتاپ ايتقاندا، باستاپقىدا ادامداردىڭ بانكروتتىق تۋرالى ءوتىنىشى قابىلدانباسا، ءۇش ايدان كەيىن ازاماتتار قايتا ءوتىنىش بەرۋگە قۇقىلى. پروسەسس ءجۇرىپ جاتىر. ەكى ايدا 50 مىڭعا جۋىق ءوتىنىش كەلىپ ءتۇستى. مەنىڭ ويىمشا، بۇل وتە جاقسى كورسەتكىش جانە قارجىلىق جاعدايدى جاقسارتۋعا جاقسى مۇمكىندىك بەرىلىپ وتىر»، - دەدى ەرجان ءبىرجانوۆ.
ەسكە سالايىق، بيىل 3 ناۋرىزدا ەلىمىزدە بانكروتتىققا ءوتىنىم قابىلداۋ باستالدى.