قازاقستاندىقتار ءجيى جۇكتەيتىن ءموبيلدى قوسىمشالار بەلگىلى بولدى.
تەحنولوگيالار مەن سيفرلىق قىزمەتتەر دامىعان زاماندا سمارتفونسىز ءومىر ءسۇرۋ قيىن. سيفرلاندىرۋ حالىق ءومىرىنىڭ بارلىق سالاسىنا ەنگىزىلىپ جاتىر. قازاقستاندىقتار اراسىندا «كوممۋنيكاسيا» ساناتىنداعى ءموبيلدى قوسىمشالار ەرەكشە سۇرانىسقا يە، دەپ حابارلايدى Almaty-akshamy.kz.
ۇزدىك بەستىككە وتاندىق ۇيالى بايلانىس وپەراتورلارىنىڭ ەكى قوسىمشاسى كىردى.
2023 جىلعى 27 قاڭتارداعى جاعداي بويىنشا قازاقستاندىقتار اراسىندا ەڭ تانىمال قوسىمشا - Telegram.
ەكىنشى ورىندا — «مەنىڭ Beeline» Beeline ۇيالى وپەراتورىنىڭ قوسىمشاسى.
Google Play ارقىلى قوسىمشانى 10 ميلليوننان اسا ادام جۇكتەگەن. وسىلايشا سوڭعى جىلدارى كورسەتكىش بىرنەشە ەسە وسكەن.
ۇزدىك ۇشتىكتى WhatsApp Business كاسىپكەرلەرگە ارنالعان ءموبيلدى قوسىمشاسى تۇيىندەيدى. ونى الەم بويىنشا 500 ميلليوننان استام قولدانۋشى تەلەفونىنا قوندىرعان.
سونداي-اق، توپ-5 تانىمال قوسىمشا قاتارىنا Tele2 قازاقستان جانە WhatsApp Messenger كىرىپ وتىر.
ال العاشقى وندىققا Snapchat، IZI، Mail.ru - Email App، Active جانە Altel.kz ەنگەن.
قازاقستاندا ۇيالى بايلانىس وپەراتورلارى قوسىمشالارىنىڭ تانىمالدىعى تاڭعالاتىن جاعداي ەمەس. سەبەبى جىلدان جىلعا ۇيالى بايلانىس ابونەنتتەرىنىڭ سانى ارتىپ كەلەدى.
ماسەلەن، 2022 جىلدىڭ جەلتوقسان ايىنىڭ سوڭىنداعى جاعداي بويىنشا كورسەتكىش ءبىر جىلدا 3،1%، 17،4 ملن ابونەنتكە دەيىن ۇلعايدى.
سوڭعى بەس جىلدا ينتەرنەت جەلىسىنە قولجەتىمدىلىگى بار ابونەنتتەر سانى 25،6%-عا ءوستى.
ودان بولەك، ۇيالى بايلانىس ابونەنتتەرىنىڭ تىعىزدىعى 100 ادامعا شاققاندا 77-دەن 89 بىرلىككە دەيىن ارتقان.
بۇگىنگى تاڭدا ەكونوميكانىڭ ءتۇرلى سەكتورلارىندا سيفرلىق قىزمەتتەردى ەنگىزۋ وزەكتى بولىپ وتىر. ماسەلەن، 2021 جىلدىڭ قورىتىندىسى بويىنشا كورسەتكىش 87،3% قۇرادى جانە ترەند ءوسىپ كەلەدى.