بيۋدجەت ەسەبىنەن سۋ ارنالارى جاقسارتىلادى
2025 جىلعا دەيىن ەل تۇرعىندارى اۋىز سۋمەن قامتاماسىز ەتىلەدى. بۇل تۋرالى بۇگىن ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«جەرگىلىكتى اتقارۋشى ورگاندار جەرگىلىكتى بيۋدجەت قاراجاتى ەسەبىنەن جارعىلىق كاپيتالىن ۇلعايتۋ ارقىلى سۋ ارنالارىنىڭ ماتەريالدىق-تەحنيكالىق بازاسىن جاقسارتۋ جونىندە ءىس-شارالار قابىلداۋى قاجەت. مەملەكەت باسشىسى تاپسىرمالارىنىڭ ىسكە اسىرىلۋى جەرگىلىكتى اتقارۋشى ورگانداردىڭ بىرلەسكەن جانە ۇيلەسىمدى جۇمىسىنا تىكەلەي بايلانىستى»، - دەدى مينيستر.
ونىڭ سوزىنە قاراعاندا، حالىقتى اۋىز سۋمەن قامتاماسىز ەتۋ ماسەلەسى يندۋستريا جانە ينفراقۇرىلىمدىق دامۋ مينيسترلىگىنىڭ تۇراقتى باقىلاۋىندا تۇر.
«مەملەكەت باسشىسىنىڭ حالىقتى بەس جىلدىڭ ىشىندە اۋىز سۋمەن تولىق قامتاماسىز ەتۋ تۋرالى تاپسىرماسى كەزەڭ-كەزەڭىمەن 2025 جىلعا دەيىن ورىندالاتىن بولادى»، - دەدى قايىربەك وسكەنبايەۆ.