اۋەزوۆ اۋدانىنداعى №202 مەكتەپ-گيمنازيا وقۋشىلارى قالنياز جىراۋدىڭ «ەر قارمىس» باتىرلىق داستانىن جارىققا شىعارىپ، وسكەلەڭ ۇرپاق اراسىندا ناسيحاتتاۋعا ۇلەس قوسقان ساندۋعاش تاعابەرگەنوۆامەن كەزدەستى.
ماقسات – «SABU Productions» ورتالىعىنىڭ باستاماسىمەن وقىرمانعا جول تارتقان «ەر قارمىس» باتىرلىق داستانىن جاس جەتكىنشەكتەرگە تانىستىرۋ. جاس وقىرمانعا ارنالعان بۇل تۋىندىدا ەر قارمىستىڭ ەرلىگى، حالقىمىزدىڭ ۇلت بولىپ قالىپتاسۋ جولىنداعى تاريحي ساتتەرى مەن جاۋجۇرەك ەرلەردىڭ وتان الدىنداعى جانقيارلىق كەزدەرى جان-جاقتى باياندالادى. ەر قارمىس بەكبولات ۇلى 1720 جىلدارى ومىرگە كەلگەن، داستاندا ونىڭ 75 جاسىندا جاۋمەن ايقاسقانى ايتىلادى. باتىر قارتايىپ، ۇيدە ناۋقاستانىپ جاتقاندا «شايقاستا ەرلىكپەن ولسەم» دەپ ارمانداعان ەكەن. كەيىن «جاۋ شاپتى» دەگەندە قولىنا نايزاسىن الىپ جاۋعا ۇمتىلعان. الماعايىپ زاماندا ءومىر سۇرگەن باتىر بابامىز جاۋمەن شايقاستا ەرلىكپەن قازا تابادى. بۇگىنگى شاكىرت – ەرتەڭگى ەل قورعايتىن ساربازدىڭ جادىنا «وتان ءۇشىن وتقا ءتۇس، كۇيمەيسىڭ» دەگەن حالىق دانالىعىن سالعانداي.
«رۋحاني جاڭعىرۋ جولىندا جاس وقىرماننىڭ ساناسىنا شاقتاپ، كوركەم سۋرەتپەن بەزەندىرىپ بۇرىنعى باتىرلىق تاريحىمىزدان سىر شەرتەتىن داستاندى قازىرگى جاستارعا لايىقتى ەتىپ شىعارۋدى ۇيعاردىق. ەر قارمىس باتىر – تاريحتا بولعان ادام. ول جايىندا كوپتەگەن جىر جازىلعان، ءباھادۇردىڭ سۇيەگى ماڭعىستاۋ جەرىندە. بۇل داستاننىڭ بىرنەشە نۇسقاسى بار. ەپوس بىزگە اۋىزشا جەتسە دە، ونىڭ ءتۇپنۇسقاسىن تاپتىق. كىتاپتى شىعارماس بۇرىن داستاندى ەكى جىلداي زەرتتەپ، زەردەلەدىك. ماڭعىستاۋلىق مارعاسقا اقىن، ق ر مەملەكەتتىك سىيلىعىنىڭ يەگەرى سۆەتقالي نۇرجان وسى نۇسقانىڭ وزگەرىسكە ۇشىراماي جەتكەنىن ايتتى»، – دەيدى يدەيا اۆتورى ساندۋعاش تاعابەرگەنوۆا.
ەر قارمىس كىتابىنىڭ 10 مىڭ دانا بولىپ شىعارىلۋىنا دەمەۋشىلىك ەتكەن «سەنتر كرەديت بانكى». كىتاپتىڭ تانىستىرىلىمى بارىسىندا وقۋشىلارعا ارنايى سىيلىقتار مەن «ەر قارمىس» كىتابى تارتۋ ەتىلدى.