2025 جىلدىڭ 1 قاڭتارىنان باستاپ مىندەتتى ساقتاندىرۋ بويىنشا سىيلىقاقىنى ەسەپتەۋ ءۇشىن قولدانىلاتىن تۇزەتۋ كوەففيسيەنتىن بەكىتۋ تۋرالى قاۋلى كۇشىنە ەنەدى، دەپ حابارلايدى aqshamnews.kz.
بۇرىن اگەنتتىك تۇزەتۋ كوەففيسيەنتى كولىك تىركەلگەن ايماقتاعى اپات دەڭگەيىنە قاراي بەلگىلەنەتىنىن حابارلاعان. ياعني، الماتىدا ساقتاندىرۋ ءۇشىن جۇرگىزۋشىلەردەن كوپ اقشا جينالعانمەن، كولىك سانىنا شاققاندا ساقتاندىرۋ بويىنشا تولەم از جاسالسا، كولىك يەسى ازىراق تولەۋى كەرەك.
مىسال رەتىندە 2024 جىلى جۇرگىزۋشى كۋالىگىن العانىنا 20 جىل بولعان، الماتىدا تۇراتىن، ەشقاشان جول اپاتىنا تۇسپەگەن، 2010 جىلعى Toyota Camry اۆتوكولىگىن جۇرگىزەتىن 40 جاستاعى جۇرگىزۋشى ءۇشىن 12 ايلىق پوليس قانشا تۇراتىنىن قاراستىرايىق:
2024 جىلعى بازالىق ساقتاندىرۋ سىيلىقاقىسى – 7014.8 تەڭگە (1،9 اەك)؛
الماتى قالاسىندا تىركەلگەن اۆتوموبيل ءۇشىن كوەففيسيەنت – 2،96؛
جەڭىل اۆتوموبيل ءۇشىن كوەففيسيەنت – 2،09؛
جاسىنا جانە جۇرگىزۋ وتىلىنە نەگىزدەلگەن كوەففيسيەنت – 1؛
ءاۆتوموبيلدى پايدالانۋ مەرزىمىنە بايلانىستى كوەففيسيەنت – 1،1؛
13-ساقتاندىرۋ كلاسى بويىنشا كوەففيسيەنت (اپاتسىز) – 0،5؛
الماتى قالاسى بويىنشا تۇزەتۋ كوەففيسيەنتى – 0،82.
سوندا: 7 014،8 × 2،96 × 2،09 × 1×1،1 × 0،5 × 0،82 = 19 571،75 تەڭگە.
2025 جىلى ايلىق ەسەپتىك كورسەتكىش (اەك) 3932 تەڭگە بولادى. بازالىق ساقتاندىرۋ سىيلىقاقىسى (1،9 اەك) 7470،8 تەڭگەگە وسەدى. الماتى قالاسى بويىنشا ۇسىنىلعان تۇزەتۋ كوەففيسيەنتى — 0.63.
ەسەپتەيىك: 7470،8 × 2،96 × 2،09 × 1 × 1،1 × 0،5 × 0،63 = 16 014،31 تەڭگە. دەمەك، 2025 جىلى مۇندا پوليس ارزاندايدى. مىسال رەتىندە العان جۇرگىزۋشى ءۇشىن ساقتاندىرۋ 3 مىڭ تەڭگەگە ارزاندايدى، ال باسقالار ءۇشىن سوما ءارتۇرلى بولادى، ءبىراق ساقتاندىرۋ تولەمى ازايادى.
الماتى، تۇركىستان، جامبىل، باتىس قازاقستان، قىزىلوردا وبلىستارى، سونداي-اق شىمكەنت پەن استاناداعى جۇرگىزۋشىلەر ءۇشىن ساقتاندىرۋ ءپوليسى قىمباتتايدى. كەلەر جىلى ەڭ قىمبات ءپوليستى قىزىلوردا وبلىسىنىڭ جۇرگىزۋشىلەرى راسىمدەيدى.