كىتاپ 4 ءبولىمدى قامتيدى.
ق ر تۇڭعىش پرەزيدەنتى - ەلباسى كىتاپحاناسىنىڭ مۋزەيىندە «قازاقستان جولى» جوباسى اياسىندا «ەگەمەن قازاقستان» رەسپۋبليكالىق گازەتى» اق دايىنداعان «ەل جانە ەلباسى» كىتابىنىڭ تۇساۋكەسەرى ءوتتى. سونىمەن قاتار تاۋەلسىزدىكتىڭ 30 جىلدىعىنا ورايلاستىرىلعان «ەگەمەندىك جانە ەلباسى» فوتوكورمەسى اشىلدى، دەپ حابارلايدى Almaty-akshamy.kz
فوتوكورمەگە شۇكىر شاحاي، يگور بۋرگاندينوۆ، يۋريي بەككەر، ورىنباي بالمۇرات جانە ەرلان وماروۆ سياقتى بەلگىلى فوتوتىلشىلەردىڭ 50-گە جۋىق فوتوسۋرەتى قويىلدى.
ولار ءتيىمدى ەكونوميكا مەن ساياسي جۇيەنى دامىتۋدىڭ وزىندىك ۇلگىسى بار زاماناۋي قازاقستاننىڭ قالىپتاسۋىنداعى ەتنوسارالىق قاتىناستاردى ۇيلەستىرۋ جولىندا ازاماتتىق بىرەگەيلىكتى، ەتنوسارالىق تۇسىنىستىكتى نىعايتۋداعى ەلباسى قىزمەتىنىڭ ماڭىزدى كەزەڭدەرىن ايقىندايدى.
فوتوكورمەگە كەلۋشىلەر قازاقستاننىڭ دامۋىنداعى جاڭا بەلەستەرگە جول اشقان تاۋەلسىزدىك تاريحىنىڭ اسا ماڭىزدى قادامدارىمەن تانىسۋعا مۇمكىندىك الادى. ءىس-شارا اياسىندا «ەگەمەن قازاقستان كىتاپحاناسى» سەرياسىمەن جارىق كورگەن «ەل جانە ەلباسى» جيناعىنىڭ تۇساۋى كەسىلدى.
باسىلىمدا ەلباسىنىڭ ارىپتەس مەملەكەت جانە قوعام قايراتكەرلەرىنىڭ، ۇزەڭگىلەستەرىنىڭ «ەگەمەن قازاقستان» گازەتىندە جاريالاعان ماقالالارى مەن ەستەلىكتەرى ۇسىنىلعان. كىتاپ 4 ءبولىمدى قامتيدى.
«ازاتتىق ساۋلەتشىسى» بولىمىندە مەملەكەت باسشىسى ق.ك. توقايەۆتىڭ «تاريحي تۇلعا تاعىلىمى» ماقالاسى مەن قازاقستاندىق ساياسي جانە قوعام قايراتكەرلەرىنىڭ ماقالالارى بەرىلگەن.
«مەملەكەت ساۋلەتشىسى» بولىمىندە زيالى قاۋىمنىڭ، اقىن-جازۋشىلار مەن عالىمداردىڭ، ت.ب. ونەر جانە مادەنيەت قايراتكەرلەرىنىڭ ەستەلىكتەرى بەرىلگەن.
«ەلباسى جانە ەلوردا» ءبولىمى ەلباسىنىڭ استانا قۇرىلىسىنا قوسقان ۇلەسى تۋرالى مەملەكەت جانە قوعام قايراتكەرلەرىنىڭ ماقالالارىن قامتيدى. «كورەگەن ساياساتكەر» بولىمىندە ەلباسىنىڭ جاھاندىق ساياساتتاعى ورنى مەن ءرولى تۋرالى الەمدىك ساياساتكەرلەردىڭ وي-پىكىرلەرى ۇسىنىلعان.