بۇل تۋرالى استانادا دەنساۋلىق ساقتاۋ سالاسىنداعى STADA Healt Report زەرتتەۋىن تانىستىرۋ بارىسىندا بەلگىلى بولدى.
بۇل زەرتتەۋ قازاقستاندا ەكىنشى رەت ۇيىمداستىرىلعان. ونىڭ اياسىندا 16 مەملەكەت قامتىلىپ، ءار ەلدە شامامەن 2 مىڭ ادام اراسىندا ساۋالناما جۇرگىزىلدى. جالپى، 16 ەلدە 18-99 جاس ارالىعىنداعى 32 013 ادام ساۋلناماعا قاتىستى، دەپ حابارلايدى Almaty-akshamy.kz قازاقپاراتقا سىلتەمە جاساپ
«ەۋرازيا» وڭىرىندەگى STADA ۆيسە-پرەزيدەنتى ارميناس ماسيەۆيچۋستىڭ ايتۋىنشا، قازاقستاندا رەسپوندەنتتەردىڭ 38 پايىزى دەنساۋلىق ساقتاۋ جۇيەسىنىڭ دەڭگەيىنە قاناعاتتانارلىق باعا بەرگەن. الايدا قازاقستاندىقتاردىڭ 30 پايىزدان استامى تۇراقتى تەكسەرۋدەن وتپەيتىنى انىقتالعان. بۇل رەتتە تۇرعىندار قاي مەديسينالىق تەكسەرۋدەن ءوتۋ كەرەك ەكەنىن بىلمەيتىنىن ايتقان.
بيىلعى زەرتتەۋ دەرەكتەرىنە قاراعاندا، ساۋالناماعا قاتىسقان قازاقستاندىقتاردىڭ 37 پايىزى ءتۇرلى دارۋمەندەردى ساتىپ الۋعا ەرەكشە ءمان بەرىپ وتىرعانى جاريالاندى. سونىمەن قاتار ادامداردىڭ 26 پايىزى دەنساۋلىققا پايدالى ازىق-تۇلىك ونىمدەرىن ساتىپ الاتىندارىن اتاپ وتكەن. رەسپوندەنتتەردىڭ 19 پايىزى پروفيلاكتيكالىق مەديسينالىق تەكسەرۋدەن ءجيى وتەتىنىن ايتىپ وتىر.
سكرينينگتەردىڭ اراسىندا ەڭ تانىمال پروسەدۋرا گينەكولوگيالىق تەكسەرۋگە قاتىستى بولعان، ياعني قازاقستاندا ايەلدەردىڭ 80 پايىزى مەن ەۋروپالىقتاردىڭ 70 پايىزى وسى دياگنوستيكادان تۇراقتى تۇردە وتەدى ەكەن. مۇنىمەن قوسا، قازاقستاندا مەديسينالىق تەكسەرۋلەر اراسىندا ەكىنشى ورىندا جالپى قان ءاناليزى تۇر، ادامداردىڭ 71% وسى ساراپتامادان وتكەن. ءاربىر التىنشى قازاقستاندىق (64%) تۇراقتى تۇردە جالپى تەكسەرۋدەن وتەتىنىن جەتكىزگەن.
ال ۇيقى ساپاسىن جاقسارتۋ تۇرعىسىندا قازاقستاندىقتار ساۋالناماعا قاتىسقان باسقا ەلدەر اراسىندا الدىڭعى ورىنعا شىققان. بۇل رەتتە ساۋلناما كەزىندە ادامداردىڭ 87 پايىزى وزدەرىن ۇيقىسىزدىق مازالامايتىنىن مالىمدەگەن.
«قازاقستان مەديسينا سالاسىنداعى يننوۆاسيالاردى ەنگىزۋ باعىتىندا دا جاقسى كورسەتكىشتەردى بايقاتتى. ماسەلەن، قازاقستاندا دارىگەردىڭ قابىلداۋىنا ونلاين رەجيمدە جازىلۋ كورسەتكىشتەرى ورتاشادان جوعارى دەڭگەيدە، ياعني 52 پايىزعا جەتكەن. ال ەۋروپادا وسى كورسەتكىش 45 پايىز شاماسىندا بولدى»، - دەدى ارميناس ماسيەۆيچۋس.