الماتى قالاسى اكىمىنىڭ ورىنباسارى الىشەر ءابدىقادىروۆ پەن شىعىس ەۋروپا ايماعى بويىنشا Mastercard بولىمشەسىنىڭ پرەزيدەنتى ياسەمين بەدير سيفرلىق تەحنولوگيالار سالاسىنداعى جوبالاردى ىسكە اسىرۋ ماقساتىندا ءوزارا تۇسىنىستىك تۋرالى مەموراندۋمعا قول قويدى، دەپ حابارلايدى almaty-akshamy.kz
تاراپتار ىنتىماقتاستىق ءۇشىن ءبىرقاتار باعىتتاردى، سونىڭ ىشىندە قولما-قول اقشاسىز تولەم جۇيەسىندە يننوۆاسيالىق شەشىمدەردى ەنگىزۋدى ايقىندادى. Mastercard كورپوراسياسىنىڭ Tourism Insights سيفرلىق پلاتفورماسى، ءتۋريستىڭ مىنەز-قۇلىق ءپروفيلىن جاساۋعا، تۇرۋ ورىندارى مەن بارۋ وبەكتىلەرىن تاڭداۋ كەزىندە ونىڭ قالاۋىن باعالاۋعا، ديناميكاداعى اۋەجايدىڭ كەپتەلىسىن جانە ت.ب. باقىلاۋعا مۇمكىندىك بەرەدى، بۇل تۋريزم يندۋسترياسىن دامىتۋ ءۇشىن شەشىم قابىلداۋعا كومەكتەسەدى.
«بۇگىنگى قادام الماتىنىڭ Smart City باعىتىندا دامۋىن جەدەلدەتۋگە، تۇرعىندار ءۇشىن دە، شەتەلدىك قوناقتار ءۇشىن دە قولايلى قالالىق ورتا قۇرۋعا، قالانىڭ تۋريستىك الەۋەتىن كەڭەيتۋگە ىقپال ەتەتىنىنە سەنىمدىمىن»، – دەدى الىشەر ءابدىقادىروۆ.
قول قويىلعان مەموراندۋم اياسىندا تاراپتار الماتى قالاسىن Mastercard City Possible Network حالىقارالىق جەلىسىنە قوسۋ تۋرالى ۋاعدالاستى.
«Mastercard باسشىلىعىنىڭ پرەزيدەنت قاسىم-جومارت توقايەۆپەن نيۋ-يوركتە وتكەن كەشەگى كەزدەسۋىندە، ءبىز ورتالىق ازيا مەن تمد-داعى Mastercard بيزنەسىنىڭ وڭىرلىك ورتالىعى الماتى بولاتىنىن جاريالادىق. سونداي-اق قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىمەن ارىپتەستىك تۋرالى بەس جىلدىق كەلىسىمگە قول قويدىق، وندا قازاقستان ۇكىمەتىمەن ىنتىماقتاستىقتىڭ باسىم تاقىرىپتارىنىڭ ءبىرى رەتىندە «اقىلدى قالالار» كورسەتىلگەن. Mastercard، بىرلەسكەن باستامالاردى ىسكە اسىرۋدا، الماتى اكىمدىگىن تەحنولوگيالارمەن جانە جاھاندىق ساراپتامامەن قولداۋعا دايىن»، - دەدى ياسەمين بەدير.
Mastercard – 60-تان استام ەلدە 1600-دەن استام مەملەكەتتىك جوبالاردى جۇرگىزەتىن جاھاندىق تولەم جانە تەحنولوگيالىق كومپانيا. قازاقستاندا كومپانيا تولەمدەردى سيفرلاندىرۋ ەسەبىنەن قولما-قول اقشاسىز ەكونوميكانى دامىتۋعا بەلسەندى قاتىسىپ، 20 جىلدان استام جۇمىس ىستەيدى.