"قازجولعزي" عالىمدارى نارىقتا ۇسىنىلعان سەمەنتبەتون جابىندارىن ساقتاپ قالۋعا ارنالعان ماتەريالداردىڭ تيىمدىلىگىن انىقتاماق.
وسى ماقساتتا ەكسپەريمەنتتىك ۋچاسكەلەردە، نارىقتا ۇسىنىلعان ماتەريالدار اراسىندا كونكۋرستىق سىناقتار وتكىزىلمەك، دەپ حابارلايدى aqshamnews.kz كولىك مينيسترلىگىنە سىلتەمە جاساپ.
سىناقتار ەلىمىزدىڭ وڭتۇستىك جانە سولتۇستىك وڭىرلەرىندە جۇرگىزىلەدى، بۇل ءارتۇرلى كليماتتىق جاعدايلاردا ماتەريالداردىڭ تيىمدىلىگىن باعالاۋعا مۇمكىندىك بەرەدى.
كونكۋرستىق سىناقتار بارىسىندا ءارتۇرلى ماتەريالداردىڭ فۋنكسيونالدىق قاسيەتتەرى تۋرالى دەرەكتەر جينالىپ، قۇرامىنداعى كەمشىلىكتەردى جويۋعا جانە قۇرامىن جاقسارتۋعا مۇمكىندىك بەرەدى.
كونكۋرستىڭ ناتيجەلەرى كەلەسى جىلدىڭ كوكتەمىندە ايقىندالاتىن بولادى، سودان كەيىن ۆەدومستۆولىق ۇيىمداردىڭ قاتىسۋىمەن سەمەنتبەتون جابىندارىن كۇتىپ-ۇستاۋ كەزىندە نارىقتا بار ماتەريالداردىڭ ساپاسى مەن ولاردى قولدانۋدىڭ ورىندىلىعى تالقىلانادى.
ەستەرىڭىزگە سالا كەتەيىك، بۇعان دەيىن جولشى عالىمدار وتاندىق جول بوياۋىن وندىرۋشىلەر اراسىندا سىناق وتكىزگەن بولاتىن. ونىمدەرى كونكۋرستىق سىناقتاردان وتپەيتىن رەيتينگى تومەن وندىرۋشىلەردى مەملەكەتتىك ساتىپ الۋ راسىمدەرىنە قاتىسۋعا جىبەرمەۋ كوزدەلۋدە.
سونداي-اق، "قازجولعزي" اۆتوموبيل جولدارىنىڭ ساپاسىن جاقسارتۋ ماقساتىندا قۇرىلىس پەن كۇتىپ-ۇستاۋدىڭ بارلىق كەزەڭدەرىندە قولدانىلاتىن ماتەريالدارعا تەكسەرۋ جۇرگىزىپ، رەيتينگتىك ءادىستى قولدانۋدى كوزدەۋدە. ال سەمەنتبەتون جابىندارىن ساقتاپ قالۋعا ارنالعان ماتەريالداردىڭ فۋنكسيونالدىق قاسيەتتەرىن انىقتاۋ جول ينفراقۇرىلىمىن جاقسارتۋ جانە ونىڭ قىزمەت ەتۋ مەرزىمىن ۇزارتۋ بويىنشا يننوۆاسيالىق شەشىمدەردى ىزدەپ-تابۋعا ءۇشىن زەرتتەۋلەر جۇرگىزۋگە مۇمكىندىك بەرمەك.