پرەزيدەنت ەلىمىزدى دامىتۋدىڭ ءاربىر قادامىن ويلاستىردى
الماتىدا «AMANAT» پارتياسى قالالىق فيليالىنىڭ پارتيا اكتيۆى پرەزيدەنت قاسىم-جومارت توقايەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى حالىققا جولداۋىن تالقىلادى، دەپ حابارلايدى Almaty-akshamy.kz.
تالقىلاۋعا پارتيا بەلسەندىلەرى، قالالىق ساياسي كەڭەس مۇشەلەرى، ءماسليحات دەپۋتاتتارى، اۋداندىق فيليالداردىڭ اتقارۋشى حاتشىلارى جانە «جاستار رۋحى» جاستار قاناتىنىڭ وكىلدەرى قاتىستى.
پارتيانىڭ قالالىق فيليالىنىڭ اتقارۋشى حاتشىسى مەيىرجان وتىنشييەۆ جولداۋدىڭ ادىلەتتى قازاقستاندى قۇرۋ جولىنداعى تاعى ءبىر ماڭىزدى قادام بولعانىن اتاپ ءوتتى.
«قازىرگى قوعامداعى سىنداردى ەسكەرە وتىرىپ، مەملەكەت باسشىسى الەۋمەتتىك ساياساتتى كۇشەيتۋدە. ءبىلىم بەرۋ مەن دەنساۋلىق ساقتاۋدى دامىتۋعا، جاستار مەن اۋىل شارۋاشىلىعىن قولداۋعا ۇلكەن قاراجات بولىنەدى، بارلىق الەۋمەتتىك تولەمدەر يندەكستەلەدى، زەينەتاقىلار قايتا قارالادى، «ۇلتتىق قور – بالالارعا» باعدارلاماسى ىسكە قوسىلادى. بۇل رەتتە، «AMANAT» پارتياسى ەلىمىزدىڭ جەتەكشى ساياسي كۇشى رەتىندە پرەزيدەنتتىڭ بارلىق باستامالارىن تولىق قولدايدى. جولداۋدا ۇسىنىلعان بارلىق رەفورمالار – بۇل ەل دامۋىنداعى قۋاتتى سەرپىلىسكە قول جەتكىزۋگە ىقپال ەتەتىن ناقتى شارالار»، - دەدى م.وتىنشييەۆ.
اماناتتىقتاردىڭ پىكىرىنشە، مۇنداي رەفورمالار ەلىمىزدىڭ الەۋمەتتىك-ەكونوميكالىق الەۋەتىن نىعايتۋعا ىقپال ەتەدى.
«ءبىز كەشەگى پرەزيدەنتتىڭ جولداۋىن ۇلكەن ۇمىتپەن كۇتتىك. ەڭ ماڭىزدى اسپەكت الەۋمەتتىك بلوك بولدى. مىسالى، ەڭ تومەنگى جالاقىنى كوبەيتۋ، بۇل ميلليونداعان ازاماتتاردىڭ ءال-اۋقاتىنا وڭ اسەر ەتەدى. ايەلدەردىڭ زەينەتكەرلىك جاسى، 2023 جىلدان باستاپ 1،5 جاسقا دەيىنگى بالا كۇتىمى بويىنشا جاردەماقى تولەمدەرىن ۇزارتۋ جانە ت.ب. ماسەلەلەر. جالپى، جولداۋدى تالداي وتىرىپ، پرەزيدەنت ەلىمىزدى دامىتۋدىڭ ءاربىر قادامىن ويلاستىرعانىن سەنىممەن ايتۋعا بولادى»، - دەپ اتاپ ءوتتى وتباسى جانە حالىقتى الەۋمەتتىك قورعاۋ ماسەلەلەرى جونىندەگى وڭىرلىك قوعامدىق كەڭەستىڭ ءتورايىمى، الماتى قالاسى ءماسليحاتىنىڭ دەپۋتاتى راحات شيماشيەۆا.
تالقىلاۋ بارىسىندا قازاق ۇلتتىق اگرارلىق زەرتتەۋ ۋنيۆەرسيتەتىنىڭ رەكتورى، «AMANAT» پارتياسى قالالىق فيليالى ساياسي كەڭەس بيۋروسىنىڭ مۇشەسى تىلەكتەس ەسپولوۆ ءوز ويىمەن ءبولىستى.
«ءبىزدىڭ مەگاپوليستە 11 ۇلتتىق ۋنيۆەرسيتەتتىڭ 8ء-ى ورنالاسقان. سوندىقتان ستۋدەنتتەردى جاتاقحانامەن قامتاماسىز ەتۋ، ونىڭ ىشىندە ستۋدەنتتەردىڭ جەكەلەگەن الەۋمەتتىك وسال ساناتتارى ءۇشىن تۇرۋ شىعىندارىن سۋبسيديالاۋ ماسەلەسى – ەل تاريحىنداعى بۇرىن-سوڭدى بولماعان وقيعا. ستۋدەنتتەر بۇل جاڭالىقتى ۇلكەن قۋانىشپەن قابىلدادى»، - دەپ تۇيىندەدى ت.ەسپولوۆ.
سونداي-اق، «AMANAT» دەپۋتاتتىق فراكسياسىنىڭ مۇشەلەرى نۇرىمبەك تاۋ، ارتۋر كوتەنوۆ، رامازان بەكبول جانە پارتيا بەلسەندىسى رايحان بولەكبايەۆا ءوز پىكىرلەرىن ءبىلدىردى.
پارتاكتيۆ قاتىسۋشىلارى جولداۋدى، اسىرەسە الەۋمەتتىك-ەكونوميكالىق بلوك بويىنشا قولداۋدى جانە جان-جاقتى ىلگەرىلەتۋدى قامتاماسىز ەتۋ ماڭىزدى دەگەن ورتاق پىكىرگە كەلدى. پارتيا مۇشەلەرىنىڭ الدىندا جاۋاپتى مىندەت تۇر - قوعام مەملەكەت باسشىسى تاپسىرمالاردىڭ ءمانىن جانە ولاردى ورىنداۋ ءۇشىن بىرلىكتىڭ قاجەتتىلىگىن ءتۇسىنۋى ءۇشىن جۇمىس ىستەۋ. ايتا كەتۋ كەرەك، پارتيا مۇشەلەرى جولداۋدىڭ نەگىزگى ماسەلەلەرىن بارلىق دەڭگەيدە كەڭىنەن تالقىلاۋعا كىرىستى.