ءبىلىم بەرۋ جۇيەسى ۇلت ساپاسىن جاقسارتۋدا ماڭىزدى ءرول اتقارادى
مەملەكەت باسشىسى قاسىم-جومارت توقايەۆ 1 قىركۇيەكتە وتكەن قازاقستان پارلامەنتى پالاتالارىنىڭ بىرلەسكەن وتىرىسىندا جاريالاعان «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا ءبىلىم بەرۋ جۇيەسىنە ايرىقشا ءمان بەردى. پرەزيدەنتىمىز تۇجىرىمداعانداي، بۇل سالا ۇلت ساپاسىن جاقسارتۋ ىسىندە اسا ماڭىزدى ءرول اتقارادى. وسى سالانىڭ وكىلى بولعاندىقتان بۇل باعدار بىزگە دە ۇلكەن جاۋاپكەرشىلىك جۇكتەيدى.
حالقىمىزداعى «ەل بولامىن دەسەڭ، بەسىگىڭدى تۇزە» دەگەن تاعىلىمدى قاعيداتقا جۇگىنگەن پرەزيدەنت تابىستى ۇلت بولۋدىڭ ماڭىزدى شارتى ءبىلىم بەرۋ جۇيەسىنىڭ ساپاسىنا تىكەلەي بايلانىستى ەكەنىنە توقتالدى. سوندىقتان دا جاستاردىڭ ءبىلىم الىپ، جان-جاقتى دامۋى ءۇشىن قولايلى جاعداي جاسالۋعا ءتيىس. جولداۋدا مەملەكەت باسشىسى وسى ماسەلەنى ماڭىزدى ۇلتتىق جوبا دەڭگەيىندە قاراستىردى. «ءبىلىمدى جانە بىرنەشە ءتىلدى مەڭگەرگەن ۇرپاق بولاشاققا سەنىممەن قادام باسادى. ءبىزدىڭ كۇشىمىز – جاستاردىڭ بىلىمىندە»،– دەدى. ونىڭ ايتۋىنشا، «كاسىبيلىك پەن ەڭبەكقورلىق قوعامىمىزدا ەڭ جوعارى ورىندا تۇرۋى كەرەك. ەلىمىزدە ەڭبەكقور ادام، كاسىبي مامان ەڭ سىيلى ادام بولۋعا ءتيىس. وسىنداي ازاماتتار مەملەكەتىمىزدى دامىتادى».
پرەزيدەنت بيىل ءبىز جاڭا كەزەڭگە قادام باسقانىمىزدى، حالقىمىز جالپىۇلتتىق رەفەرەندۋمدا ساياسي جاڭعىرۋ باعدارىن قولداعانىن قاداپ ايتتى. راسىندا دا، كۇنى كەشە عانا ەلىمىزدە وتكىزىلگەن كونستيتۋسيالىق رەفورما جاڭا، ادىلەتتى قازاقستاندى قۇرۋ جولىنداعى اسا ماڭىزدى قادام بولدى. باستى ماقساتتاردىڭ ءبىرى – حالقىمىزدىڭ ءال-اۋقاتىنىڭ ساپالى جانە ينكليۋزيۆتى ءوسۋىن قامتاماسىز ەتۋ. جوعارى ءبىلىم سالاسىنىڭ رەفورمالارىن وسى باعداردا جۇرگىزگەن ابزال. مەملەكەت باسشىسى اتاپ وتكەندەي، وتاندىق جوعارى وقۋ ورىندارىندا ءبىلىم الۋعا جىلدىق ءوسىمى 2-3 پايىز بولاتىن جەڭىلدەتىلگەن نەسيە بەرىلمەك. بۇل شارالار جوعارى ءبىلىمنىڭ قولجەتىمدىلىگىن ارتتىرىپ قانا قويماي، قوعامدا ارىپتەستىك پەن ءوزارا جاۋاپكەرشىلىك قاعيداتىن نىعايتا تۇسپەك.
ستۋدەنتتەرگە، عىلىم، دەنساۋلىق ساقتاۋ، ءوندىرىس، IT سالالارىنىڭ بىلىكتى ماماندارىنا ءتۇرلى جەڭىلدىكتەر بەرىلىپ، قولداۋ كورسەتىلەتىنى وسى سالالاردا ورىن العان ءتۇرلى وزەكتى ماسەلەلەردى شەشۋگە كومەكتەسەدى. ماسەلەن، قاي وڭىردە، قاي قالادا بولماسىن، بۇگىندە اتا-انالاردى دا، ستۋدەنت-جاستاردى دا تولعاندىراتىن نەگىزگى قاجەتتىلىكتىڭ ءبىرى – كوپتەن بەرى شەشىمىن تاپپاي كەلە جاتقان جاتاقحانا ماسەلەسى ەدى. پرەزيدەنت ءوز جولداۋىندا وسى تۇيتكىلدى شەشۋدىڭ ناقتى جولدارىن كورسەتتى.
– كەلەسى ماڭىزدى ماسەلە – ستۋدەنتتەردى جاتاقحانامەن قامتاماسىز ەتۋ. بۇل تۇيتكىلدى شەشۋ ءۇشىن جوعارى وقۋ ورىندارىمەن جانە قۇرىلىس كومپانيالارىمەن مەملەكەتتىك-جەكەمەنشىك سەرىكتەستىك ورناتۋ ءتاسىلىن بارىنشا ەنگىزۋ كەرەك. سونداي-اق، بارلىق ماسەلەنىڭ شەشىمىن تابۋدى مەملەكەتتىڭ موينىنا ءىلۋ دۇرىس ەمەس دەپ سانايمىن. سول سەبەپتى، مەملەكەتتەن قاراجات الۋ ءۇشىن جەكەمەنشىك جوعارى وقۋ ورىندارىنىڭ جاتاقحاناسى بولۋى شارت. ارينە، مۇنى وقۋ ورىندارىنان بىرتىندەپ تالاپ ەتكەن ءجون. ستۋدەنتتەردىڭ جەكەلەگەن، الەۋمەتتىك تۇرعىدان از قامتىلعان ساناتتارى ءۇشىن پاتەر جالداۋعا كەتەتىن شىعىنىن سۋبسيديالاۋ مۇمكىندىگىن دە قاراستىرۋعا بولادى. جوعارى وقۋ ورىندارى جانىنداعى ەنداۋمەنت-قورلار ءبىلىم بەرۋ ەكوجۇيەسىن دامىتۋدىڭ نەگىزگى بۋىنىنا اينالۋعا ءتيىس. سۇرانىسقا يە بولىپ وتىرعان جانە جوعارى بىلىكتى مامانداردىڭ تاپشىلىعىن ازايتۋ قاجەت. عىلىم، دەنساۋلىق ساقتاۋ، ءوندىرىس، IT سالالارىنىڭ بىلىكتى ماماندارىنا جەڭىلدىك جاسالادى، – دەپ تۇجىرىمداعان قاسىم-جومارت توقايەۆ كاسىبيلىك پەن ەڭبەكقورلىق قوعامىمىزدا ەڭ جوعارى ورىندا تۇرۋى قاجەتتىگىن اتاپ ءوتتى. قانداي كاسىپپەن اينالىسساڭ دا، ونى ساپالى اتقارۋ ماڭىزدى. جاستار ناقتى ءبىر ماماندىقتىڭ قىر-سىرىن جەتىك بىلۋگە ۇمتىلعانى ءجون. ءوز سالاسىنىڭ شەبەرىنە ءاردايىم سۇرانىس بولادى. وسكەلەڭ ۇرپاق قازاقستاندا عانا ەمەس، وزگە ەلدەردە باسەكەگە قابىلەتتى بولۋى كەرەك.