تۇركىستان وبلىسىندا ماروككالىق شەگىرتكە دەرناسىلدەرى پايدا بولعان.
اۋىل شارۋاشىلىعى مينيسترلىگىنىڭ اقپاراتىنا سايكەس، بيىل ءۇيىرلى شەگىرتكە زيانكەستەرىمەن كۇرەسۋگە رەسپۋبليكالىق بيۋدجەتتەن 3،8 ملرد تەڭگە ءبولىندى، دەپ حابارلايدى Almaty-akshamy.kz
مامانداردىڭ بولجامىنشا، شەگىرتكە 1،6 ملن گا اۋماققا تارالۋى مۇمكىن. بۇگىنگى تاڭدا 385،3 مىڭ گا الاڭدا پەستيسيدتەردىڭ قاجەتتى قورى بار.
اۋماقتاردى وڭدەۋگە مامانداندىرىلعان تەحنيكا، ونىڭ ىشىندە جەر ءۇستى جانە اۋە كولىگى جۇمىلدىرىلادى.
ءقازىردىڭ وزىندە تۇركىستان وبلىسىندا ماروككالىق شەگىرتكە دەرناسىلدەرىنىڭ پايدا بولعانى انىقتالدى. ايماققا پەستيسيدتەر تولىعىمەن جەتكىزىلدى. 8-9 ساۋىردە وڭدەۋ ءىس-شارالارىن باستاۋ جوسپارلانىپ وتىر.
باسقا ايماقتاردا جەردى حيميالىق وڭدەۋ جۇمىستارى شەگىرتكەلەردىڭ تارالۋ وشاقتارى انىقتالعان كەزدە باستالادى.
ودان بولەك، كورشىلەس مەملەكەتتەرمەن شەكارالاس اۋماقتاردا بىرلەسكەن زەرتتەۋ جۇمىستارى جۇرگىزىلەدى. بۇل تۋرالى قازاقستاننىڭ اشم ماماندارى رەسەي، جۇڭگو جانە وزبەكستان مەملەكەتتەرىندەگى ارىپتەستەرىمەن الدىن الا كەلىستى.