وقۋ-اعارتۋ مينيسترلىگى "بالالاردى زورلىق-زومبىلىقتان قورعاۋ، ءسۋيسيدتىڭ الدىن الۋ جانە ولاردىڭ قۇقىقتارى مەن سالاماتتىعىن قامتاماسىز ەتۋ جونىندەگى 2023-2025 جىلدارعا ارنالعان كەشەندى جوسپارعا" ەنگىزىلەتىن وزگەرتۋلەردى قوعام تالقىسىنا ۇسىندى، دەپ حابارلايدى aqshamnews.kz.
جوسپارعا سايكەس، اتا-انالارعا ارنالعان كۋرستاردى قازاقستاندىق وتباسىلار ءۇشىن مىندەتتى ەتۋ ماسەلەسى قاراستىرىلادى. مينيسترلىكتىڭ ۇسىنىسى بويىنشا، جاستار نەكەسىن تىركەۋ الدىندا، جاس وتباسىلار جۇكتىلىك كەزەڭىندە جانە بالانىڭ دۇنيەگە كەلۋىنىڭ الدىندا، سونداي-اق، بالانى بالاباقشا مەن مەكتەپكە بەرەر الدىندا اتا-انالارعا ارنالعان كۋرستارعا قاتىسۋى كەرەك.
بۇل اتا-انالاردىڭ جاۋاپكەرشىلىگىن ارتتىرۋعا، بالا تاربيەسىن جاقسارتۋعا كومەكتەسەدى جانە الەۋمەتتىك ماسەلەلەردى شەشۋدە دە ماڭىزدى. بالانى دۇنيەگە اكەلگەن كەزدە جانە بالاباقشا مەن مەكتەپكە قابىلداۋ كەزىندە اتا-انالاردى وقىتۋ بالالاردىڭ ءبىلىم بەرۋ ورتاسىنا بەيىمدەلۋىن جانە پەداگوگتار مەن مەديسينا قىزمەتكەرلەرىمەن ءوزارا ارەكەتتەسۋىن جاقسارتادى، – دەلىنگەن مينيسترلىكتىڭ تۇسىندىرمە جازباسىندا.
سونىمەن قاتار، اتا-انالار مەكتەبى اكەلەردىڭ تاربيە پروسەسىنە ارالاسۋىن ارتتىرۋعا كومەكتەسەدى.