بارلىق قازاقستاندىقتاردى ەل تاۋەلسىزدىگىنىڭ 30 جىلدىق مەرەيلى تويىمەن قۇتتىقتايمىن!
وتىز جىل – ءبىر ۇرپاق بەلەسى. وسى وتىز جىلدا قالىپتاسقان ۇرپاقتىڭ الدى تاۋەلسىزدىك قۇرداستارى بولسا، مىنە، ولار دا وردا بۇزار جاسقا كەلىپ، قوعامنىڭ بارلىق سالالارىندا جەمىستى ەڭبەك اتقارىپ ءجۇر.
تاياۋدا تۇڭعىش پرەزيدەنتىمىز، ەلباسى نۇرسۇلتان ءابىش ۇلى نازاربايەۆتىڭ «تاۋەلسىزدىك تاعىلىمى» اتتى ماقالاسى جارىق كوردى. ەلباسى تاۋەلسىزدىك جولىندا قانشا اتا-بابالارىمىزدىڭ قۇربان بولعانىن ايتا كەلە، قازاقستاننىڭ ءوز تاۋەلسىزدىگىن جاريالاۋ تۇسىندا بولعان تاريحي ساتتەرىمەن ءبولىسىپ، ءوزى باسقارعان كەزەڭدەردەگى قيىنشىلىقتار مەن قۋانىشتاردى ەسكە الىپ، كەيىنگى جاستارعا تاعىلىمدى ويلارىن جەتكىزىپتى. اۋەلى پاتشالىق رەسەي يمپەرياسىنىڭ وتارلاۋ ساياساتى، ودان كەڭەس ۇكىمەتىنىڭ توتاليتارلىق رەجيمىنىڭ جەمىسى بولعان اشارشىلىق، ساياسي قۋعىن-سۇرگىن، رەپرەسسيا سالدارىنان تالاي اسىلدارىمىزدان، رۋحاني قۇندىلىقتارىمىزدان، تاريحي جادىگەرلەرىمىزدەن، سالت-داستۇرلەرىمىزدەن ايرىلىپ، ۇلتتىق بولمىسىمىزدى جوعالتىپ الا جازداعانىمىزدى تىلگە تيەك ەتىپ، ەگەمەندىكتىڭ ارقاسىندا قايتا جاڭعىرىپ، دامۋدىڭ داڭعىل جولىنا تۇسكەنىمىزگە تاۋبە دەيدى.
جاس مەملەكەتىمىزدىڭ ىرگەلى ەلگە اينالۋىنا تۇڭعىش پرەزيدەنتىمىز، ەلباسى نۇرسۇلتان ءابىش ۇلى نازاربايەۆتىڭ وراسان زور ەڭبەك سىڭىرگەنى بەلگىلى. ونىڭ كورەگەندىلىگى مەن ەل باسقارۋداعى تاجىريبەسىنىڭ، الەمدىك ساياساتتاعى دۇرىس ۇستانىمدارىنىڭ ارقاسىندا تاۋەلسىز ەلىمىز قارىشتاپ دامىپ، قازىرگى تاڭدا الەم تانىعان قازاقستانعا اينالىپ وتىر. ارينە، مۇنداي جەتىستىكتەرگە جەتۋدە ونى قولداۋشى حالقى مەن ءارتۇرلى سالا ماماندارىنىڭ ۇلەسى دە زور. اسىرەسە، ەلباسىنىڭ ەڭ ماڭىزدى شەشىمدەرىنىڭ ءبىرى – الەمدەگى ءتورتىنشى يادرولىق قارۋ ارسەنالىنا يە بولا تۇرا، ودان باس تارتۋ، ەلىمىزدى جاھانداعى بەيبىتشىلىك جارشىسى دەگەن اتقا يە بولۋىنا ىقپال ەتىپ، راسىندا دا ادامزات ءۇشىن ەڭ جويقىن زارداپ اكەلۋشى جاپپاي قىراتىن قارۋدىڭ دامۋىنا توسقاۋىل قوياتىن ۇلكەن قادام بولعانى بارشاعا ايان. تۇڭعىش پرەزيدەنتىمىزدىڭ باستاماسىمەن ەلىمىزدەگى ءتۇرلى سالالاردا كوپتەگەن يگى ىستەر جولعا قويىلعانىن دا كوپشىلىك جاقسى بىلەدى.
«ەل اعاسىز بولمايدى، تون جاعاسىز بولمايدى» دەيدى بابالارىمىز. قاي زاماندا دا حالقىمىز ۇلكەندى سىيلاپ، ولاردىڭ دانالىققا تولى وسيەتتەرىن ورىنداپ، بولاشاققا باعىت الىپ وتىرعان. اۋەلدەن مەكەن ەتكەن اتا قونىسىمىز، وسىناۋ ۇلان-عايىر جەردى جانكەشتىلىكپەن قورعاپ، بىزدەرگە اماناتتاپ، سونداي-اق ادامگەرشىلىك پەن مەيىرىمدى، دوستىق مەن ادالدىقتى، ۇيات مەن نامىستى، ىنتىماق پەن بىرلىكتى ار ەتكەن وزىق ءداستۇر قالدىرعان اتا-بابالارىمىزدىڭ تەكتىلىگى مەن ەرلىگىنەن اسقان ۇلگى جوق بىزدەرگە. تاۋەلسىزدىك – بىزگە سول بابالارىمىزدىڭ جاساعان ەرلىكتەرى مەن ەتكەن دۇعالارىنىڭ بەدەلىنە بەرىلگەن جاراتقاننىڭ سىيى. ەندىگى جەردە ونى ساقتاپ، باياندى ەتۋ – بىزگە جۇكتەلگەن مىندەت.
ارمان جۇدەبايەۆ،
قۇرمانعازى اتىنداعى
قازاق ۇلتتىق كونسەرۆاتورياسىنىڭ رەكتورى،
ق ر ەڭبەك سىڭىرگەن قايراتكەرى