ەكسترەميستىك ۇيىمداردىڭ شوتتارى انىقتالىپ، ولارعا شەكتەۋ قويىلدى

قاسىم-جومارت توقايەۆقا قارجىلىق مونيتورينگ اگەنتتىگىنىڭ بىلتىرعى اتقارعان جۇمىسىنىڭ قورىتىندىسى مەن الداعى كەزەڭگە ارنالعان جوسپارى جونىندە باياندالدى، دەپ حابارلايدى almaty-akshamy.kz

دميتريي مالاحوۆتىڭ ايتۋىنشا، قىلمىستىق جولمەن تۇسكەن كىرىستەردى جىلىستاتۋعا قارسى كۇرەس سالاسىندا 5،7 مىڭنان استام تۇتىنۋشىمەن ىسكەرلىك قارىم-قاتىناس توقتاتىلعان. كريپتوۆاليۋتا ايىرباستايتىن 1،5 مىڭنان اسا زاڭسىز ونلاين-سەرۆيس انىقتالىپ، بۇعاتتالعان. 49 زاڭسىز ماينەر اشكەرەلەنگەن. ءقازىر ولارعا قاتىستى تەكسەرۋ جۇمىستارى جۇرگىزىلىپ جاتىر. تەرروريستىك جانە ەكسترەميستىك ۇيىمداردىڭ شوتتارىنا قارجى اۋدارۋعا قاتىستى 1،2 مىڭ ارەكەت انىقتالىپ، ولارعا شەكتەۋ قويىلدى.

مەملەكەت باسشىسىنا 41 قارجى پيراميداسىنىڭ جويىلعانى، زارداپ شەككەندەرگە 4،6 ميلليارد تەڭگە قايتارىلعانى جونىندە مالىمەت بەرىلدى. الاياقتىق بەلگىلەرى بار 8 مىڭنان استام سايت پەن اككاۋنت بۇعاتتالىپ، 4،8 مىڭ ونلاين-كازينو سايتىنىڭ قىزمەتى توقتاتىلدى. ەكىنشى دەڭگەيلى بانكتەرمەن جانە قارجى رەتتەۋشىلەرىمەن بىرلەسىپ، 21 جاسقا تولماعان ازاماتتاردىڭ بۋكمەكەرلىك كەڭسەلەرگە تولەم جاساۋ مۇمكىندىگىن اۆتوماتتى تۇردە شەكتەۋ تەتىگى ەنگىزىلىپ جاتىر.

بۇدان بولەك، پرەزيدەنتكە اگەنتتىك 74 ميلليارد تەڭگە كولەمىندە نەگىزسىز بيۋدجەت شىعىندارىنىڭ الدىن العانى، زاڭسىز قولما-قول اقشامەن اينالىساتىن 59 «كولەڭكەلى» الاڭ قىزمەتىنىڭ توقتاتىلعانى، 7 ۇيىمداسقان قىلمىستىق توپتىڭ جويىلعانى، سوتقا دەيىنگى تەرگەۋ امالدارىنىڭ اياسىندا 141 ميلليارد تەڭگە كولەمىندە كەلتىرىلگەن زالالدىڭ وتەلگەنى جونىندە ەسەپ بەرىلدى. سونداي-اق كاپيتالدى زاڭسىز شىعارۋعا قارسى ءىس-قيمىل سالاسىندا جالپى سوماسى 276 ميلليارد تەڭگەنى قۇرايتىن اكتيۆتەر قايتارىلعان.

قارجىلىق مونيتورينگ اگەنتتىگى الداعى ۋاقىتتا زاڭسىز شىعارىلعان اكتيۆتەردى قايتارۋ جانە ادال كاسىپكەرلەردىڭ ىسىنە ارالاسپاي، «كولەڭكەلى» ەكونوميكاداعى قىلمىستاردىڭ جولىن كەسۋ جۇمىستارىنا باسا ءمان بەرەدى. سونىمەن قاتار قارجىلىق مونيتورينگتى دامىتۋ تۇجىرىمداماسىن جانە كولەڭكەلى ەكونوميكاعا قارسى ءىس-قيمىل جونىندەگى كەشەندى جوسپاردى جۇزەگە اسىرۋ، جىلىستاتۋ جۇيەسىن FATF (اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبى) حالىقارالىق ستاندارتتارىنا تولىق سايكەستەندىرۋ ءۇشىن شارالار قابىلدانادى.

قاسىم-جومارت توقايەۆ ادال بيزنەستى قورعاۋ شارالارىن كۇشەيتۋ قاجەت ەكەنىن ەرەكشە اتاپ ءوتىپ، اگەنتتىك قىزمەتىنىڭ نەگىزگى باعىتتارى بويىنشا جۇمىستاردى جالعاستىرۋدى تاپسىردى.