بۇل باعدارلاما 4 جىلعا ارنالعان.
قازاقستاندىق ەكسپورتتاۋشىلار ورتالىق ازيا ەلدەرىندەگى ارىپتەستەرىمەن بىرگە ەۋروپالىق وداق ەسەبىنەن ترانسشەكارالىق ساۋدا بويىنشا تەگىن ءبىلىم الادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
استانادا «QazTrade» اكسيونەرلىك قوعامىنىڭ ۇيىمداستىرۋىمەن اتالعان باعدارلامانىڭ تانىستىرىلىم ءوتتى.
«QazTrade» اكيسونەرلىك قوعامى باس ديرەكتورىنىڭ ورىنباسارى نۇرلان قۇلباتىروۆتىڭ ايتۋىنا قاراعاندا، اتالعان باعدارلاما «Ready4Trade Central Asia» جوباسىنىڭ اياسىندا ىسكە اسىرىلماق.
«جالپى، بۇل باعدارلاما 4 جىلعا ارنالعان. 2019 جىلدان بەرى بىرنەشە كومپونەنتى ىسكە اسىرىلدى. مىسالى، بيىل جازدا ساۋدا پورتالى ىسكە قوسىلعان ەدى. سونداي ۇلكەن باعىتتىڭ ءبىرى – قازاقستاندىق ەكسپورتتاۋشىلاردى وقىتۋ. 1،5 جىل بويى كاسىبي نۇسقاۋشىلار جۇمىس ىستەپ، تالىمگەرلەردى دايارلادى. ەندى سول تالىمگەرلەر ەكسپورتتاۋشىلارعا ساباق بەرەدى»، - دەدى ول.
ال ەۋروپالىق وداق وكىلدىگى ورتالىق ازيانىڭ وڭىرلىك باعدارلامالارى قازاقستانداعى ىنتىماقتاستىق ءبولىمى باعدارلامالارىنىڭ مەنەدجەرى يۋريي سكاسكەيەۆيچتىڭ ايتۋىنشا، وقىتۋ باعدارلاماسى وسىدان 4 جىل بۇرىن بولىنگەن 15 ملن ەۋرونىڭ ەسەبىنەن ىسكە اسادى.
«مەنىڭ پورتفوليومداعى ەڭ ۇلكەن باعدارلامانىڭ ءبىرى – وسى 4 جىلدىق باعدارلاما. ول بۇكىل ورتالىق ازيا ەلدەرىنە باعىتتالعان. بيۋدجەتى ايتارلىقتاي سالماقتى – 15 ملن ەۆرو. وسى قاراجات اياسىندا قارجىلاندىرىلىپ جاتقان باعىتتىڭ ءبىرى ەكسپورتتاۋشىلاردى وقىتۋعا ارنالىپ وتىر»، - دەدى يۋريي سكاسكەيەۆيچ.
جوبا اۆتورلارىنىڭ مالىمەتىنە سۇيەنسەك، قازاقستاندىق ەكسپورتتاۋشىلار وقۋ باعدارلاماسى ارقىلى حالىقارالىق ساۋدا ەرەجەلەرى، ەكسپورتتىق راسىمدەر، ترانزيتتىك باعىتتار، ساپا جانە سايكەستىك ستاندارتتارى، ەۋروپالىق وداق نارىعىنا ارنالعان ناقتى تالاپتار تۋرالى ءبىلىم الىپ، ول العان بىلىمدەرىن ءىس جۇزىندە قولدانىپ ماشىقتانادى.
وقىتۋ ونلاين رەجيمدە دە، وفففلاين رەجيمدە دە ۇسىنىلادى. ترەنينگتى دۇنيەجۇزىلىك ساۋدا ۇيىمى مەن بىرىككەن ۇلتتار ۇيىمىنا قاراستى حالىقارالىق ساۋدا ورتالىعى ازىرلەگەن.
بۇل باعدارلاما قازاقستاننىڭ بۇكىل ايماقتارىن قامتيدى دەپ جوسپارلانعان. سول ءۇشىن QazTrade كوميپانياسىنىڭ جانىنان ەلەكتروندىق وقىتۋ پلاتفورماسى اشىلىپ وتىر. سول پلاتفورمانىڭ (https://www.qaztradeacademy.kz/)، كومەگىمەن الەۋەتتى جانە جۇمىس ىستەپ تۇرعان ەكسپورتتاۋشىلار بۇكىل كۋرستاردى ونلاين رەجيمىندە تەگىن ءوتىپ، سەرتيفيكاتتار الادى.