الماتى اكىمى جۇڭگو ەكسيمبانكىنىڭ ۆيسە-پرەزيدەنتىمەن ينۆەستيسيالاردى تالقىلادى
الماتى اكىمى ەربولات دوسايەۆ قىتايدىڭ ەكسپورتتىق-يمپورتتىق بانكىنىڭ (ەكسيمبانك) ۆيسە-پرەزيدەنتى يان دۋننين باستاعان دەلەگاسيامەن كەزدەسۋ وتكىزدى. كەزدەسۋدە ينفراقۇرىلىمدىق جانە جاسىل جوبالاردى دامىتۋ، قارجى نارىعىن كەڭەيتۋ، ساۋدا-ەكونوميكالىق بايلانىستاردى تەرەڭدەتۋ جانە تۋريستىك ىنتىماقتاستىقتى ارتتىرۋ ماسەلەلەرى تالقىلاندى، دەپ حابارلايدى aqshamnews.kz
نەگىزگى تالقىلانعان جوبالار اراسىندا كولىك ينفراقۇرىلىمىن جاقسارتۋ (جاڭا مەترو جەلىلەرىن سالۋ)، ەكونوميكانى ءارتاراپتاندىرۋ ءۇشىن جاڭا يندۋستريالىق جوبالاردى جۇزەگە اسىرۋ، قالدىقتاردى قايتا وڭدەۋ زاۋىتىن سالۋ سەكىلدى جاسىل جوبالاردى ىسكە اسىرۋ جانە ءتۋريزمدى دامىتۋ بار.
2024 جىل قىتايداعى قازاقستان ءتۋريزمى جىلى، ال 2025 جىل قازاقستانداعى جۇڭگو ءتۋريزمى جىلى رەتىندە جاريالانعانى اتاپ ءوتىلدى. بيىلعى جىلدىڭ ءبىرىنشى جارتىسىندا الماتىعا قىتايدان 40 مىڭنان استام تۋريست كەلدى، بۇل وتكەن جىلدىڭ سايكەس كەزەڭىمەن سالىستىرعاندا 68%-عا كوپ.
سونىمەن قاتار، الماتىنىڭ شەتەلدىك ينۆەستيسيالاردى تارتۋ سالاسىنداعى ءرولى تالقىلاندى. اعىمداعى جىلدىڭ العاشقى جارتىسىندا قالا 3،8 ملرد اقش دوللارى كولەمىندە تىكەلەي شەتەلدىك ينۆەستيسيالار تارتتى. الماتى مەن جۇڭگو اراسىنداعى تاۋار اينالىمى 2024 جىلدىڭ 9 ايىندا 5،6 ملرد اقش دوللارىن قۇرادى، بۇل جۇڭگو مەن قازاقستان اراسىنداعى جالپى تاۋار اينالىمىنىڭ 28،9%-ىن قۇرايدى.
يان دۋننين حانىم جىلى قابىلداعانى ءۇشىن العىسىن ءبىلدىرىپ، ەكسيمبانكتىڭ الماتىنى تۇراقتى دامىتۋعا باعىتتالعان باستامالاردى قولداۋعا دايىن ەكەنىن اتاپ ءوتتى.
تاراپتار يندۋستريالاندىرۋدى، كولىك ينفراقۇرىلىمىن، قارجى نارىعىن جانە الماتىنىڭ تۋريستىك الەۋەتىن دامىتۋ شەڭبەرىندە جەمىستى ىنتىماقتاستىقتى جالعاستىرۋ نيەتىن راستادى.