بۇرىنعى پرەزيدەنت بىشكەك قالاسىنا جەتكىزىلگەننەن كەيىن دەرەۋ ۆەدومستۆوارالىق تەرگەۋ توبىنا بەرىلدى.
قىرعىزستاننىڭ بۇرىنعى پرەزيدەنتى اسقار اقايەۆ بىشكەككە جەتكىزىلدى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
بۇعان دەيىن حابارلانعانداي، «ءقۇمتور» جوباسىن ىسكە اسىرۋ كەزىندەگى سىبايلاس جەمقورلىق فاكتىلەرى بويىنشا ەلدىڭ بۇرىنعى پرەزيدەنتى اسقار اقايەۆقا ىزدەۋ جاريالانعان بولاتىن.
اسقار اقايەۆ جوعارى لاۋازىمدى وزگە شەنەۋنىكتەرمەن قاتار 1992 جىلى «ءقۇمتور» جوباسى بويىنشا باس كەلىسىم جاساۋ، 1994 جىلى وعان وزگەرىستەر ەنگىزۋ، سونداي-اق 2003 جىلى «كامەكو» كومپانياسىمەن باس كەلىسىمدى قايتا قۇرىلىمداۋ كەزىندەگى سىبايلاس جەمقورلىق فاكتىسى بويىنشا قىلمىستىق جاۋاپقا تارتىلدى.
وسىلايشا، اسقار اقايەۆتىڭ پرەزيدەنتتىگى كەزەڭىندە «ءقۇمتور» جوباسىن ىسكە اسىرۋداعى جەمقورلىققا قاتىسى بار بارلىق كىنالى تۇلعاعا قۇقىقتىق باعا بەرىلدى.
«سونىمەن قاتار قىرعىز رەسپۋبليكاسىنىڭ ۇقمك-مەن بىرلەسكەن تەرگەۋ بارىسىندا اسقار اقايەۆتى رەسپۋبليكا اۋماعىنا جەتكىزۋ جولىمەن ونى قىلمىستىق جاۋاپتىلىققا تارتۋ بولىگىندە تاريحي ادىلەتتىلىكتى قالپىنا كەلتىرۋگە باعىتتالعان بەلسەندى جۇمىس جۇرگىزىلدى.
ۇقمك قابىلداعان شارالار ناتيجەسىندە 2021 جىلعى 2 تامىزدا بۇرىنعى پرەزيدەنت اسقار اقايەۆ بىشكەك قالاسىنا جەتكىزىلىپ، كەيىن دەرەۋ ۆەدومستۆوارالىق تەرگەۋ توبىنا بەرىلدى.
اسقار اقايەۆ ءقازىر ۇقمك عيماراتىندا. وندا ونىڭ قاتىسۋىمەن «ءقۇمتور» كەن ورنى بويىنشا قىلمىستىق ءىس شەڭبەرىندە قاجەتتى تەرگەۋ ارەكەتتەرى جۇرگىزىلەدى.
«جۇرگىزىلگەن تەرگەۋ ارەكەتتەرىنىڭ ناتيجەلەرى جانە قىلمىستىق ءىس بويىنشا، ونىڭ ىشىندە ا.اقايەۆقا قاتىستى قابىلدانعان پروسەسسۋالدىق شەشىمدەر تۋرالى، ۇقمك جۇرتشىلىقتى قوسىمشا حاباردار ەتەتىن بولادى»، - دەلىنگەن «كابار» اقپاراتىندا.
ەسكە سالا كەتەيىك، 2005 جىلدىڭ ناۋرىز ايىنداعى توڭكەرىستەن كەيىن اسقار اقايەۆ رەسەيگە قاشىپ كەتكەن بولاتىن جانە وسى كۇنگە دەيىن سوندا بولدى.