ۆاكسينا العان وقىتۋشىلار قوسىمشا اقى نەمەسە اقىلى دەمالىس الادى.
قازاقستاندىق جوعارى وقۋ ورىندارى ق ر ءبىلىم جانە عىلىم ءمينيسترى اسحات ايماعامبەتوۆتىڭ تاپسىرماسى بويىنشا جوعارى وقۋ ورىندارىنىڭ ءبىلىم الۋشىلارى اراسىندا ۆاكسينا سالۋدى قولداۋ اكسياسىن باستايدى، دەپ حابارلايدى Almaty-akshamy.kz.
ق ر ءبىلىم جانە عىلىم مينيسترلىگىنىڭ باسپا ءسوز قىزمەتى تاراتقان مالىمەتكە سايكەس، COVID–19 ىندەتىنە قارسى ەكپە العان ستۋدەنتتەر جوعارى وقۋ ورىندارىنىڭ مۇمكىندىكتەرىنە بايلانىستى وقۋعا، جاتاقحانالاردا تۇرۋعا جەڭىلدىكتەر الىپ، ءتۇرلى سىيلىقتارعا يە بولادى.
وسىلايشا، جوعارى وقۋ ورىندارى حالىقتىڭ دەنساۋلىعىن قورعاۋ ءۇشىن ۆاكسينالاۋ قارقىنىن كۇشەيتۋ جونىندەگى جۇمىستى قولدايدى. تەك ستۋدەنتتەر عانا ەمەس، سونىمەن قاتار جوعارى وقۋ ورىندارىنىڭ ەكپە سالدىرعان وقىتۋشىلارى دا ماتەريالدىق ماتەريالدىق ىنتالاندىرۋعا يە بولادى.
ءال-فارابي اتىنداعى قازۇۋ، ل.ن. گۋميليەۆ اتىنداعى ەۇۋ، اباي اتىنداعى قازۇپۋ، ق.ي. ساتبايەۆ اتىنداعى قازۇتزۋ، م. اۋەزوۆ اتىنداعى وقۋ، م. وتەمىسوۆ اتىنداعى بقۋ، ح. دوسمۇحامەدوۆ اتىنداعى اتىراۋ ۋنيۆەرسيتەتى ۆاكسينالاۋدى قولداۋ بويىنشا اكسيالاردى باستاپ كەتتى.
ءبىرقاتار جوعارى وقۋ ورنىنىڭ ستۋدەنتتەرى ءۇشىن وقۋعا، جاتاقحانالاردا تۇرۋعا جەڭىلدىكتەر، ساۋىقتىرۋ شيپاجايلارىنا تەگىن جولدامالار، تەگىن تاماقتانۋ جانە قوعامدىق كولىكتى پايدالانۋ تالوندارى قاراستىرىلعان.
سونداي-اق جوعارى وقۋ ورىندارى ۆاكسينا العان ستۋدەنتتەر ءۇشىن شەت تىلدەرى، كومپيۋتەرلىك ساۋاتتىلىق جانە كاسىپكەرلىك داعدىلاردى دامىتاتىن تەگىن كۋرستار ۇيىمداستىرۋدى جوسپارلاپ وتىر. سونىمەن قاتار ەكپە سالدىرعان كەيبىر ۋنيۆەرسيتەتتەردىڭ ستۋدەنتتەرى فيتنەس زالدارىنا، باسسەينگە، تەاترعا، كينوتەاترعا جانە كونسەرتتەرگە تەگىن بارا الادى.
اتالعان جوعارى وقۋ ورىندارىنىڭ وقىتۋشىلارى دا نازاردان تىس قالمادى. ۆاكسينالانعان وقىتۋشىلار قوسىمشا اقى نەمەسە اقىلى دەمالىس الادى.
«جوعارى وقۋ ورىندارىن كوروناۆيرۋستىڭ ەلدە تارالۋى الاڭداتىپ وتىر. ۆاكسيناسيا ماسەلەلەرى مەن ونىڭ شەشىلۋ جولدارىن جوعارى وقۋ ورىندارىنىڭ وزدەرى قابىلدايدى. ءمينيستردىڭ تاپسىرماسى بويىنشا جوعارى وقۋ ورىندارى ستۋدەنتتەر مەن وقىتۋشىلاردى ۆاكسينا الۋعا شاقىرىپ، ىنتالاندىرۋ شارالارىن قابىلداپ جاتىر. بۇل اكسيا ءبىزدىڭ ازاماتتاردىڭ ساناسىن وياتۋعا كومەكتەسەدى دەپ سەنەمىز. ءبىز بىرلەسە وتىرىپ، ءقاۋىپتى ۆيرۋستى جەڭە الامىز جانە كارانتين مۇمكىندىگىنشە تەز اياقتالادى دەپ ۇمىتتەنەمىز. باسقا جوعارى وقۋ ورىندارىن دا ۆاكسينا سالۋدى قولداۋ ءۇشىن ىنتالاندىرۋ شارالارىن ۇيىمداستىرۋعا شاقىرامىز. سەبەبى بۇل كوروناۆيرۋستىڭ تارالۋىن توقتاتۋدىڭ جالعىز جولى»، – دەپ اتاپ ءوتتى ءبىلىم جانە عىلىم ۆيسە-مينيسترى قۋانىش ەرعالييەۆ.