قازىرگى زاماندا قوقىس – تەك تۇرمىستىق قالدىق ەمەس، قايتا وڭدەلىپ، پايدالى ونىمگە اينالاتىن قۇندى رەسۋرس. ەكولوگيالىق مادەنيەتتى بالا كەزدەن قالىپتاستىرۋ – بولاشاق ۇرپاقتىڭ تابيعاتقا دەگەن جاۋاپكەرشىلىگىن ارتتىرادى.
الماتى قالاسىنداعى №202 مەكتەپ-گيمنازيانىڭ 2 «ءا» سىنىپ وقۋشىلارى قوقىستى قايتا وڭدەۋدىڭ ماڭىزدىلىعىن شىعارماشىلىق جولمەن كورسەتءتى. ولار تۇرمىستىق قالدىقتاردى مۇمكىندىگىنشە قايتا وڭدەپ، ءتۇرلى بۇيىمدار جاساپ شىقتى.
كورمەگە قويىلعان بۇيىمداردىڭ ءارقايسىسى – بالالار قيالى مەن ەڭبەگىنىڭ ناتيجەسى. ءبىرى اۋە شارى، ءبىرى ساماۋرىن، ءتىپتى كيىز ءۇي، ءۇي جانۋارلارى، ىدىس-اياق، وسىمدىكتەر مەن ۇيگە قاجەتتى جابدىقتارعا دەيىن جاساعان. ءار تۋىندى تەك ەستەتيكالىق مانگە يە ەمەس، سونىمەن قاتار ەكولوگيالىق وي سالادى.
سىنىپ جەتەكشىسى گۇلفايرۋس نۇرلىبەك قىزىنىڭ ايتۋىنشا، بۇل شاراعا بالالار ءوز ەركىمەن، ەرەكشە قىزىعۋشىلىقپەن قاتىسقان.
«شارانىڭ باستى ماقساتى – وقۋشىلاردىڭ ەكولوگيالىق ساۋاتىن ارتتىرۋ، اينالانى تازا ۇستاۋعا باۋلۋ جانە «تازا قازاقستان» اكسياسىنا قولداۋ كورسەتۋ»، – دەيدى ۇستاز.
مەكتەپتىڭ باستاۋىش سىنىپتار كافەدراسىنىڭ جەتەكشىسى اينۇر توقتاسىن قىزى دا جاس شەبەرلەردىڭ ەڭبەگىنە جوعارى باعا بەرىپ، ولاردىڭ شىعارماشىلىعى مەن ويلاۋ قابىلەتىنە ءتانتى بولعانىن جەتكىزدى.
«كەيبىر بۇيىمدار ادام ويىنا كەلە بەرمەيتىن ەرەكشە يدەيالارمەن جاسالعان»، – دەپ اتاپ ءوتتى ول.
ەكولوگيالىق مادەنيەتتى بالا جاسىنان قالىپتاستىرۋ – بولاشاق ۇرپاقتىڭ سانالى ازامات بولىپ وسۋىنە نەگىز بولادى. بۇل ورايدا ەرنازار شاحناز ەسىمدى وقۋشىنىڭ پىكىرى وي سالادى:
«مەن ءوزىم تۇراتىن قالانى ءاردايىم تازا كۇيىندە كورگىم كەلەدى. ول ءۇشىن جاۋاپكەرشىلىكتى ءار ادام وزىنەن باستاۋى كەرەك. مىسالى، سۋ ىشسەڭ – بوتەلكەسىن قوقىس جاشىگىنە تاستا، كامپيت جەسەڭ – قاعازىن جەرگە تاستاما. ءبارىمىز وسى ادەتتى ۇستانساق، قالادا شاشىلعان قوقىس بولماس ەدى»، – دەيدى ول.
كورمەگە وقۋشىلار دايىنداعان 50-دەن استام بۇيىم قويىلدى. جاس شەبەرلەر مەكتەپ باسشىلىعى مەن كورەرمەندەرگە ءوز جۇمىسى تۋرالى ايتىپ، بۇيىمداردى دايىنداۋ بارىسىمەن تانىستىردى.
وقۋشىلاردىڭ قاراپايىم قوقىستان ادەمى ءارى پايدالى بۇيىمدار جاساۋى – شىعارماشىلىق پەن ەكولوگيالىق تاربيەنىڭ كەرەمەت ۇيلەسىمى. مۇنداي شارالار بالالاردىڭ بويىندا تابيعاتقا جاناشىرلىقپەن قاراۋ، تازالىق ساقتاۋ، ىسىراپقا جول بەرمەۋ سەكىلدى ماڭىزدى داعدىلاردى قالىپتاستىرادى.
قالدىقتى قايتا وڭدەۋگە بولاتىن دۇنيە دەپ قابىلداۋ – تەك كوزقاراس ەمەس، ۇلكەن مادەنيەتتىڭ كورىنىسى. بالالاردىڭ بويىنان وسىنداي قاسيەتتىڭ تابىلىپ جاتقانى، ارينە، قۋانارلىق جايت