«شىمبۇلاق» تاۋ كۋرورتىندا العاش رەت EcoDay ەكوفەستيۆالى ءوتتى.
ءبىر كۇندىك شارانىڭ ماقساتى – تۇراقتى ءومىر سالتىن ناسيحاتتاپ، قوناقتارعا تابيعاتتى قورعاۋدىڭ ماڭىزىن ءىس جۇزىندە كورسەتۋ.
فەستيۆال «شىمبۇلاق» كۋرورتى، Recycle Birge ەكولوگيالىق قوزعالىسى جانە HelloEco – قازاقستانداعى العاشقى zero waste دۇكەنى بىرىگىپ ۇيىمداستىردى. ولار ەكولوگيانى تەك تەوريا ەمەس، ناقتى ءارى قولجەتىمدى ارەكەت رەتىندە كورسەتۋگە تىرىستى.
تاجىريبە ارقىلى ۇيرەنۋ
EcoDay اياسىندا كەلۋشىلەرگە:
• قاعاز بەن پلاستيكتى قايتا وڭدەۋ،
• تابيعي سپرەي جاساۋ،
• پلاستيكسىز كۇتىم قۇرالدارىن پايدالانۋ بويىنشا شەبەرلىك ساباقتارى ۇسىنىلدى.
سونداي-اق ارنايى ايماقتاردا:
• Leave No Trace قاعيدالارىمەن (تابيعاتقا زيان كەلتىرمەي دەمالۋ)،
• اپسايكلينگپەن (ەسكى زاتتاردى جاڭا پايدالى بۇيىمعا اينالدىرۋ) تانىستى.
قوناقتار تاپسىرمالاردى ورىنداپ، ەكو-سىيلىقتار ۇتىپ الدى. بۇل ولاردىڭ كۇندەلىكتى ادەتتەرىنە جاڭا كوزقاراسپەن قاراۋىنا تۇرتكى بولدى.
Shymbulak Outdoor ۇيىمى باسشىسىنىڭ ورىنباسارى ماحامبەت ابدۋللايەۆ EcoDay-دىڭ تۇراقتى تۇردە وتەتىنىن ايتىپ، بۇل باستاما كۋرورتتىڭ ەكولوگيالىق دامۋ باعىتىنا تولىق سايكەس كەلەتىنىن اتاپ ءوتتى.
ەكولوگيا – بۇل ءومىردى جەڭىلدەتۋ
HelloEco دۇكەنىنىڭ تەڭ قۇرىلتايشىسى دينا وگاي فەستيۆالدەگى سوزىندە ەكولوگيانىڭ سانالى تاڭداۋ ەكەنىن جەتكىزدى:
«ەكولوگيالىق ءومىر ءسۇرۋ – بۇل كوپ رەتتىك زاتتاردى قولدانۋ، ويلانىپ ارەكەت ەتۋ. تابيعاتتى قورعاۋ ءۇشىن ءومىر سالتىڭدى تۇبەگەيلى وزگەرتۋدىڭ قاجەتى جوق. زاماناۋي ومىرمەن قاتار تابيعاتتى دا قورعاۋعا بولادى».
ايتا كەتەيىك، HelloEco دۇكەنى الماتىنىڭ سامال ىقشاماۋدانىندا ورنالاسقان. مۇندا ازىق-تۇلىك، كوسمەتيكا، تۇرمىستىق حيميا جانە گيگيەنا قۇرالدارىن پلاستيكسىز ساتىپ الۋعا بولادى.
ەكولوگيالىق ءبىلىم – مادەنيەتتىڭ ىرگەتاسى
فەستيۆالدىڭ نەگىزگى سەرىكتەستەرىنىڭ ءبىرى – Recycle Birge ۇيىمى. ونىڭ تەڭ قۇرىلتايشىسى، ەكولوگ پاكيزات سايلاۋبەكوۆا حالىقتىڭ ەكولوگيالىق ساۋاتىن ارتتىرۋ باستى ماقسات ەكەنىن ايتتى:
«قايتا وڭدەۋ، ءبىر رەتتىك زاتتاردان باس تارتۋ قيىن ەمەس. EcoDay اياسىندا ءبىز قالدىقتاردى دۇرىس باسقارۋ تۋرالى پايدالى اقپاراتپەن بولىستىك. «شىمبۇلاقتىڭ» باستاماسىن قولدايمىز جانە بولاشاقتا دا بىرگە جۇمىس ىستەۋگە دايىنبىز».
سونداي-اق سايلاۋبەكوۆا ءار ادامنىڭ تابيعات اياسىنا شىققان كەزدە وزىنەن كەيىن قوقىس تاستاپ كەتەتىنىن ەسكە سالدى.
«قوقىستى جيناۋ، وسىمدىكتەردى جۇلماۋ سياقتى قاراپايىم ارەكەتتەردىڭ ءوزى – ۇلكەن ماڭىزعا يە. EcoDay سياقتى شارالار بۇل ويدى تۇسىنىكتى ءارى شىنايى جەتكىزۋگە كومەكتەسەدى»، – دەدى ول.