«تازا قازاقستان» ەكولوگيالىق اكسياسى الماتى قالاسىنىڭ تۇركسىب اۋدانىندا كاسىپكەرلەردىڭ قولداۋىمەن جالعاسىن تاپتى. «اليۋر اۆتو» كومپانياسى اۋقىمدى ءىس-شاراعا بەلسەندى قولداۋ كورسەتىپ، ءوز اۋماعىندا تازالىق شارالارىن ۇيىمداستىردى. سونداي-اق، بارلىق كاسىپكەرلەردى يگى ءىس-شاراعا اتسالىسۋعا شاقىردى.
كومپانيانىڭ اكىمشىلىك-شارۋاشىلىق قامتاماسىز ەتۋ ءبولىمىنىڭ جەتەكشىسى باۋىرجان الپىسبايەۆتىڭ ايتۋىنشا، بۇل شارا ءبىر رەتتىك ەمەس، تۇراقتى تۇردە جالعاسىن تابادى.
– بۇگىنگى اكسيا بارىسىندا ءبىز وزىمىزگە تيەسىلى اۋماقتى قوقىستان تازارتىپ، ايالداما كەشەنىن جانە عيماراتتاردىڭ قاسبەتىن جۋدىق. سونداي-اق، جاسىل جەلەكتى كۇتىپ-باپتاۋ جانە اباتتاندىرۋ جۇمىستارى دا جۇرگىزىلۋدە. ءبىز بۇل ەكولوگيالىق باستامانى قولداپ، قالامىزدىڭ تازالىعىنا تۇراقتى تۇردە ۇلەس قوسۋعا دايىنبىز. بارلىق كاسىپكەرلەردى وسى شاراعا قاتىسىپ، قالامىزدىڭ تازالىعىن ساقتاۋعا شاقىرامىز، – دەيدى باۋىرجان الپىسبايەۆ.
بۇل باستاما الماتى قالاسى اكىمدىگىنىڭ اباتتاندىرۋ پاسپورتىنا سايكەس جۇزەگە اسىرىلۋدا. ياعني ءاربىر شاعىن جانە ورتا بيزنەس وكىلى ءوز اۋماعىن تازا ۇستاۋعا، جىلىنا كەمىندە ەكى رەت – كوكتەمدە جانە كۇزدە سەنبىلىك ۇيىمداستىرۋعا مىندەتتى.
تۇركسىب اۋدانى اكىمىنىڭ اپپاراتىنىڭ كاسىپكەرلىكتى جانە ونەركاسىپتى دامىتۋ ءبولىمىنىڭ باس مامانى ەردوس اۋباكىروۆتىڭ ايتۋىنشا، مۇنداي ءىس-شارالار اۋداننىڭ سانيتارلىق جاعدايىن جاقسارتىپ قانا قويماي، قالا تۇرعىندارى مەن قوناقتارى ءۇشىن قولايلى ورتا قالىپتاستىرۋعا دا ىقپال ەتەدى.
– كاسىپكەرلەردىڭ وسىنداي ەكولوگيالىق باستامالارعا بەلسەنە اتسالىسۋى – قالا ەكولوگياسىن جاقسارتۋدىڭ ماڭىزدى قادامى. اۋدانىمىزداعى ءاربىر كاسىپكەر وزىنە تيەسىلى اۋماقتىڭ تازالىعىنا جاۋاپكەرشىلىكپەن قاراۋى ءتيىس. بۇل – تەك سانيتارلىق تالاپ قانا ەمەس، سونداي-اق قالا مادەنيەتىنىڭ كورسەتكىشى، – دەيدى ەردوس اۋباكىروۆ.
بۇگىندە اكسيا اياسىندا قوقىس شىعارۋ، اۋماقتى كوگالداندىرۋ جانە سانيتارلىق تازارتۋ جۇمىستارى بەلسەندى تۇردە جۇرگىزىلۋدە. ۇيىمداستىرۋشىلار بۇل ءىس-شارانىڭ تۇراقتى تۇردە وتكىزىلىپ تۇراتىنىن اتاپ ءوتتى.