ايىپپۇل سوماسى 30 مىڭنان 306 مىڭ 300 تەڭگەگە دەيىن سالىنۋ مۇمكىن.
دەمالىس كۇندەرى الماتىدا تاۋلى-ورماندى ايماقتا ءورت قاۋىپسىزدىگى ەرەجەلەرىن بۇزعانى ءۇشىن 21 ادام جاۋاپقا تارتىلدى، دەپ حابارلايدى Almaty-akshamy.kz.
دەمالىس جانە مەرەكە كۇندەرى تاۋلى-ورماندى جەرلەردە ورتتەردىڭ الدىن الۋ ءۇشىن تجد، تابيعاتتى قورعاۋ پوليسياسى جانە ىلە-الاتاۋ مۇتپ قىزمەتكەرلەرىنەن تۇراتىن ءموبيلدى توپ ۇزدىكسىز جۇمىس اتقاردى.
«45 بىرلەسكەن رەيدتەر بارىسىندا 23 ساۋىردەن باستاپ 10 مىڭعا جۋىق جادىناما تاراتىلدى، تاۋلى، رۇقسات ەتىلمەگەن جەرلەردە وت جاعۋدىڭ 39 جاعدايدى بولدىرماي، 21 ادام اكىمشىلىك جاۋاپكەرشىلىككە تارتىلدى، ولاردىڭ ەكەۋى جالپى سوماسى 76 مىڭ 575 تگ ايىپپۇل سالىندى»، - دەلىنگەن الماتى قالاسى توتەنشە جاڭدايلار دەپارتامەنتىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، ورمان شارۋاشىلىعى مەكەمەلەرى مەن تابيعاتتى قورعاۋ پوليسياسىنىڭ قىزمەتكەرلەرى ەرەكشە قورعالاتىن تابيعي اۋماقتاردا وت جاققانى ءۇشىن اكىمشىلىك ايىپپۇل سالۋعا ۋاكىلەتتى. ايىپپۇل سوماسى 30 مىڭنان 306 مىڭ 300 تەڭگەگە دەيىن سالىنۋ مۇمكىن.
«وسىعان وراي، دەمالۋشىلاردان تەمەكى تۇقىلىن قۇرعاق شوپكە تاستاماۋدى، وت جاقپاۋدى جانە اشىق وتتى پايدالانباۋدى، شىنى سىنىقتارىن جانە باسقا دا قوقىستاردى قالدىرماۋدى سۇرايمىز»، - دەلىنگەن حابارلامادا.
ەستەرىڭىزگە سالا كەتەيىك، ىلە-الاتاۋ ۇلتتىق پاركىندە، المااراساندا، ۇلكەن الماتى جانە كازاچكا وزەندەرىنىڭ بويىندا تاماق دايىنداۋ ءۇشىن ارنايى جابدىقتالعان ورىندار (ورىندىق، ۇستەل، بەتوندالعان الاڭ، مانگال) بار، الايدا شىرشا جانىندا وت جاعۋعا قاتاڭ تىيىم سالىنادى.
سونىمەن قاتار، مەدەۋ اۋدانىنداعى مەدەۋ تابيعي پاركىندە جانە ناۋرىزباي اۋدانىنداعى اقساي شاتقالىندا وت جاعۋ ۇسىنىلمايدى.