بيىل جاز ىستىق بولادى.
ەكولوگيا جانە تابيعي رەسۋرستار ءمينيسترى ەرلان نىسانبايەۆ قازاقستاندا بيىل جاز ىستىق بولاتىنىن ەسكەرتتى، دەپ حابارلايدى aqshamnews.kz
"قازگيدرومەتتىڭ بولجامىنا سايكەس بيىل جاز وتكەن جىلدارعا قاراعاندا ىستىق بولادى. وسىعان بايلانىستى وبلىس اكىمدىكتەرى دالا ورتتەرىنىڭ الدىن الۋ جانە جويۋ بويىنشا جان-جاقتى شارالار قابىلداپ، ورمان شارۋاشىلىقتارىنىڭ كۇشتەرى مەن قۇرالدارىن تولىق جاۋىنگەرلىك دايىندىققا كەلتىرۋى قاجەت. مينيسترلىك ءوز كەزەگىندە ۆەدومستۆولىق باعىنىستاعى ۇيىمداردى تولىققاندى جاۋىنگەرلىك ازىرلىككە كەلتىرۋ جانە مەملەكەتتىك ورمان قورى اۋماعىندا ءىرى ورمان ورتتەرىنىڭ الدىن الۋ بويىنشا بارلىق قاجەتتى شارالاردى قابىلداپ جاتىر"، – دەدى ول.
ءمينيستردىڭ سوزىنشە، بيىل اقتوبە، اتىراۋ، شىعىس قازاقستان، جامبىل، باتىس قازاقستان، قوستاناي، پاۆلودار، سولتۇستىك قازاقستان جانە تۇركىستان وبلىستارىنىڭ ورمان شارۋاشىلىقتارى جانە «سەمەي ورمانى» رەزەرۆاتى ءورت ماۋسىمىنا دايىن بولماعان. مينيسترلىك تەكسەرىس ناتيجەلەرى بويىنشا وبلىس اكىمدىكتەرىنە 15 ساۋىرىنە دەيىن انىقتالعان كەمشىلىكتەردى جويۋ جانە تەحنيكا مەن جەكە قۇرامدى تولىق جاۋىنگەرلىك ازىرلىككە كەلتىرۋ بويىنشا تالاپتار ۇسىنعان.