ەكىباستۇزداعى جاعدايدان بارلىق اكىمدەر ساباق الۋى ءتيىس - پرەمەر-مينيستر

بۇگىن ۇكىمەت وتىرىسىندا پرەمەر-مينيستر ءاليحان سمايىلوۆ وسىلاي دەدى.

ءارى مۇنداي اپات قايتالانباس ءۇشىن ەلىمىزدەگى بارلىق ەنەرگەتيكالىق نىساندارعا تەحنيكالىق اۋديت جۇرگىزۋدى تاپسىردى، دەپ حابارلايدى Almaty-akshamy.kz.

ەكىباستۇزداعى جاعداي ۇكىمەت وتىرىسىندا قارالدى. وبلىس اكىمىنىڭ ايتۋىنشا، ءقازىر قالاداعى جاعداي ءالى ءماز ەمەس. "25 كوپ پاتەرلى جانە 100-گە جۋىق جەر ۇيدە جىلۋ جوق"، - دەيدى ءابىلقايىر ىسقاقوۆ.

«بۇل ۇيلەر جىلۋدى قابىلداي الماي وتىر. ءوز كەزەگىندە جىلۋ جەلىسىندە ىستىق سۋ بار. ءبىراق اتالعان ۇيلەردەگى ىشكى جىلۋ جۇيەسىن قالپىنا كەلتىرۋمىز كەرەك. سول ءۇشىن باسقا قالالاردان قوسىمشا تاعى دا 23 بريگادا كومەككە كەلدى. سونىمەن قاتار جىلۋسىز وتىرعان تۇرعىندارعا 1200-گە جۋىق جىلىتۋ قۇرالدارىن جەتكىزۋ ۇيىمداستىرىلدى»، - دەيدى پاۆلودار وبلىسىنىڭ اكىمى ءابىلقايىر ىسقاقوۆ.

ال ۇكىمەت باسشىسى وسى ەكىباستۇزداعى اپاتتان بارلىق اكىمدەر قورىتىندى شىعارۋى كەرەك ەكەنىن ايتتى. ءارى ەنەرگەتيكا، يندۋستريا جانە ينفراقۇرىلىمدىق دامۋ مينيسترلىكتەرىنە دەرەۋ اپات سەبەبىن انىقتاۋدى جانە ەلدەگى بارلىق ەنەرگەتيكالىق نىساندارعا تەحنيكالىق اۋديت جۇرگىزۋدى تاپسىردى.