ەكىباستۇزداعى اپات: بارلىق شىعىندى كومپانيا جاۋىپ بەرەدى - كلەبانوۆ

قالاداعى جاعداي ءالى دە تۇراقتالمادى

ەكىباستۇزداعى اپاتتان زارداپ شەككەن ۇيلەردى جىلۋ ەلەكتر ورتالىعىنىڭ باسشىسى الەكساندر كلەبانوۆ ءوز قاراجاتىنا جوندەپ بەرەتىن بولدى، دەپ حابارلايدى Almaty-akshamy.kz Almaty.tv-گە سىلتەمە جاساپ.

ونىڭ سوزىنشە، قازاندىقتارداعى جۇمىس توقتاعان سوڭ، جىلۋ جەلىلەرى زاقىمدانعان. كاسىپكەر جىلۋ ەلەكتر ورتالىعىنىڭ ەسكىرگەنىن، وعان جوندەۋ جۇمىستارىن جاساماعانىن مويىنداپ وتىر. ال ونىڭ سەبەبىن تابىستىڭ جوقتىعىمەن بايلانىستىردى. جەرگىلىكتى بيلىك قۇبىرلاردىڭ ەسكىرگەنىن بىلەدى. ەندى ەكىباستۇزداعى جىلۋ ەلەكتر ورتالىعىن قارجىلاندىرۋ ىسىنە مەملەكەت ارالاسۋى مۇمكىن.

«اپاتتىڭ سەبەبىنە قاراماستان، ءبىز زارداپ شەككەن ۇيلەردى جوندەۋدى موينىمىزعا الامىز. بۇگىننەن باستاپ، كىشكەنتاي بالالار مەن ولاردىڭ انالارىنا بىرنەشە ساناتورييدەن ورىن الىپ بەردىك. وسىنداي جاعدايدىڭ بولعانى وكىنىشتى. ءبىراق بارلىق شىعىندى كومپانيا جاۋىپ بەرەدى»، – دەدى  «ورتالىق ازيا ەلەكتر ەنەرگەتيكاسى كورپوراسياسى» اق ديرەكتورلار كەڭەسىنىڭ ءتوراعاسى الەكساندر كلەبانوۆ.

ۆيسە-پرەمەر رومان سكليار اپات جۇمىسشىلاردىڭ كەسىرىنەن بولعانىن ايتقان ەدى.  ونىڭ ايتۋىنشا، قىزمەتكەرلەردىڭ قاتەلىگىنەن قىسىم كوتەرىلىپ كەتكەن.

27 قاراشا كۇنى ەكىباستۇزداعى جىلۋ جەلىلەرىندە 43 جەردەن جارىلىس بولعان ەدى. قالاداعى جاعداي ءالى دە تۇراقتالمادى.