جۇرت ۇيدەگى بالا-شاعاسى ءۇشىن الاڭداپ وتىر
الماتى وبلىسىنىڭ كەمەرتوعان اۋىلىندا ءبىر كۇندە 5 ۇيگە ۇرى ءتۇسىپ، باعالى بۇيىمدار مەن اقشانى قولدى ەتكەن. دەپ حابارلايدى Almaty-akshamy.kz Almaty.tv-گە سىلتەمە جاساپ.
باقىلاۋدىڭ جوقتىعىنان، ءتارتىپتىڭ قاداعالانباۋىنان كەمەرتوعاندا ۇرى-قارى كوبەيدى دەگەن كوپشىلىك جاعدايدىڭ الاڭداتاتىنىن ايتىپ شاعىمداندى. ويتكەنى تاپا-تال تۇستە ءبىر كوشەدەگى 5 بىردەي ءۇي تونالعان. ەندى جۇرت ۇيدەگى بالا-شاعاسى ءۇشىن قورقىپ وتىر.
«تاپا-تال تۇستە ۇرى نە ءۇشىن تۇسەدى؟ ساعات 10:00-11:00- دە ءبارى سابىلىپ جۇمىسقا كەتەدى. ۇيدە ايەلى مەن بالا-شاعا بولادى. ولار ءۇيدى قورعايمىن دەپ جۇگىرىپ جۇرگەندە، ءولتىرىپ، پىشاقتاپ كەتسە شە؟»، – دەدى كەمەرتوعان اۋىلىنىڭ تۇرعىنى جاڭىلاي ارىپبايەۆا.
ۋايىمعا سالىنعان قالىڭ كوپشىلىك اۋىلداعى تارتىپسىزدىكتى ۋچاسكەلىك پوليسەيلەردىڭ جەتىسپەۋشىلىگىمەن بايلانىستىرىپ وتىر. تۇرعىنداردىڭ ايتۋىنشا، پوليسەيلەر باقىلاۋدى كۇشەيتسە، ولقىلىق بولماس ەدى.
«اپتاسىنا ءبىر رەت پروفيلاكتيكا جۇرگىزىپ تۇرۋى كەرەك قوي. جۇرگەن ادامدى «كىمسىڭ؟ قايدا باراسىڭ؟» دەپ سۇراۋ كەرەك توقتاتىپ. كەشكە جاقىن جينالىپ، جىگىتتەر ءوزىمىز بولىپ اراسىندا قاراپ قويامىز»، – دەدى كەمەرتوعان اۋىلىنىڭ تۇرعىنى بيگەلدى تاپەلوۆ.
ال كۇنى كەشە ءۇيى تونالىپ، اقشاسى مەن باعالى بۇيىمدارى ۇرلانعان اۋىل تۇرعىنى تاڭنان كەشە دەيىن جۇمىستا جۇرەتىنىن ايتادى. ونىڭ تىرنەكتەپ جيىپ، تىعىپ قويعان قۇندى زاتتارىن تۇك قويماي الىپ كەتكەن.
«پوليسيا قىزمەتكەرلەرىنە تەلەفون شالعان ەدىك، ساعات 22:00-دا ارەڭ كەلدى. ءسويتىپ، كريميناليستەر كەلىپ، ساۋساق ىزدەرىن الىپ كەتتى. كەلەسى كوشەدە ءتورت ۇيگە تۇسكەن. شۋباسىن، اقشاسىن الىپ كەتكەن»، – دەدى كەمەرتوعان اۋىلىنىڭ تۇرعىنى مۇرات مىڭجاساروۆ.
ال قاراساي اۋدانىنىڭ قۇزىرلى ورگان وكىلدەرى بۇل ىسكە قاتىستى ءتيىستى شارۋا اتقارىلىپ جاتقانىن ايتتى. ولاردىڭ ايتۋىنشا، بۇعان دەيىن دە ۇرلىققا بارعان كۇدىكتىلەردىڭ قولىنا كىسەن تاعىلعان.
«الماتى وبلىستىق قاراساي اۋداندىق پوليسيا باسقارماسىندا متف، جاڭاقۇرىلىس ەلدى مەكەنىندە ۇرلىق تىركەلگەن. وسى اتالعان فاكتى بويىنشا قىلمىستىق ءىس قوزعالىپ، ءقازىر تەرگەپ تەكسەرۋ جۇمىسى جۇرگىزىلىپ وتىر. اتالعان اۋىلدىق اۋماقتا ءقازىر 11 ۋچاسكەلىك پوليسيا ينسپەكتورى قىزمەت اتقارادى جانە ءبىر جەدەل ۋاكىل بار. ۇلكەن اۋىلدى قامتۋ ءۇشىن قىزمەتكەرلەر جەتىسپەيدى»، – دەدى قاراساي اپب باستىعىنىڭ ورىنباسارى ەرتىس توقتاروۆ.
«بىزدە وسى اۋىلعا بولىنگەن 10 ۋچاسكەلىك پوليسيا قىزمەتكەرى بار. ءبىراق ءبىزدىڭ حالىق سانى سوڭعى ساناق بويىنشا 50-60 مىڭعا جەتىپ قالدى. ونىڭ الدىندا سىزدەر بىلمەيسىزدەر عوي قانداي جۇمىستار جاسالعانىن»، – دەدى ىرگەلى اۋىلدىق وكرۋگىنىڭ اكىمى ابىلاي ىسقاقوۆ.
ءدۇيىم ەلدىڭ تىنىشتىعىن ساقتاۋ ءۇشىن قاراساي اۋداندىق پوليسيا باسقارماسى قوسىمشا قىزمەتكەر جۇمىلدىرامىز دەپ سەندىردى. ول ءۇشىن ءتيىستى تاپسىرما بەرىلگەنىن دە تىلگە تيەك ەتتى.