ەكىباستۇزدا اپات سالدارىنان زاقىمدالعان 50 شاقتى پاتەر انىقتالدى. بۇل ۇيلەردى دۇيسەنبىدەن باستاپ رەتكە كەلتىرۋ ءۇشىن بريگادالار جۇمىسقا كىرىسەدى، دەپ حابارلايدى Almaty-akshamy.kz Inform.kz-كە سىلتەمە جاساپ.
«اكىمدىك قىزمەتكەرلەرىمەن بىرگە پاتەرلەردى ارالاپ شىقتىق. اپات سالدارىنان بارلىعى زاقىمدالعان ەلۋ شاقتى پاتەر انىقتالدى. بۇل ۇيلەرگە دۇيسەنبىدەن باستاپ بريگادالار كىرىپ، ادام تۇراتىنداي جاعدايعا كەلتىرەدى. قالعان وتىنىشتەر توپتاستىرىلعاننان كەيىن جۇمىس باستالادى. ەگەر دە كوميسسيا تۇرمىستىق تەحنيكا اپات سالدارىنان ىستەن شىققانىن راستاسا، شىعىننىڭ وتەلەتىندىگىنە ءۇمىت ارتۋعا بولادى»، — دەدى «واەك» اق باسقارما ءتوراعاسىنىڭ ورىنباسارى لەونيد يانۋشكو باسپا ءسوز كونفەرەنسياسىندا.
ەكىباستۇز قالاسىنىڭ اكىمى ايان بەيسەكيننىڭ ايتۋىنشا، بارلىق زارداپ شەككەن پاتەرلەر بويىنشا جەكە ءتىزىم جاسالۋدا. ول ءۇشىن جەتى مەكەنجاي بويىنشا وتىنىشتەردى قابىلدايتىن ارنايى پۋنكتتەر اشىلعان. بۇدان بولەك، اكىمشىلىكتە زارداپ شەككەن ازاماتتاردىڭ شاعىمدارىن قابىلدايتىن پۋنكت بار.
«بۇل ماسەلەگە قاتىستى «واەك» اق باسشىلىعىمەن كەلىسسوزدەر جۇرگىزىلگەن. سوندىقتان دا جالعان اقپارات بولماۋى ءتيىس. مىندەتتى تۇردە جوندەۋ جۇمىستارى جۇرگىزىلەدى. اقاۋلاردى انىقتايتىن 70 ادامنان تۇراتىن جەتى بريگادا قۇرىلعان. تۇرعىنداردىڭ وزدەرى جوندەۋدى باستاعان جاعدايلار دا بار. ول ءۇشىن چەكتەردى ۇسىنۋ قاجەت. مۇنداي جاعدايدا كوميسيا تەكسەرگەننەن كەيىن شىعىن وتەلەدى»، — دەدى ايان بەيسەكين.