ەكىباستۇز قالاسىنىڭ اكىمى ايان بەيسەكين باسپا ءسوز جيىنىندا سۋ اققان پاتەر يەلەرىنىڭ شىعىنى قالاي وتەلەتىنىن ءمالىم ەتتى، دەپ حابارلايدى Almaty-akshamy.kz Inbusiness.kz-كە سىلتەمە جاساپ.
"قىس كەزىندە سۋىق ءۇيدى جىلىتۋ وتە قيىن. وكىنىشكە وراي، كەيبىر ۇيلەردە باتارەيلەردىڭ جارىلۋى ورىن الدى. جارىلعان باتارەيلەردىڭ بارلىعىن ۇيگە جىلۋ بەرمەي تۇرىپ بىردەن اۋىستىرىپ جاتىرمىز. ءبىراق ۇيگە جىلۋ بەرگەننەن كەيىن كوزگە ساۋ بولىپ كورىنگەن كەيبىر باتارەيلەر ىستىق سۋ كەلگەن كەزدە جارىلىپ كەتىپ جاتىر. ونداي جاعداي كوپ ەمەس، ءبىراق بار"، - دەدى ايان بەيسەكين.
قالا اكىمىنىڭ ايتۋىنشا، بۇنداي مەكەنجايلار بويىنشا ارنايى اپاتتىق بريگادالار قۇرىلعان. ولار تەز ارادا بارىپ، قالپىنا كەلتىرىپ جاتىر.
ايان بەيسەكين پاتەرلەرى بۇلىنگەن تۇرعىندارعا مىندەتتى تۇردە ءتيىستى شارالار قولدانىلاتىنىن اتاپ ءوتتى.
"ەڭ ءبىرىنشى توتەنشە جاعداي رەجيمى اياسىندا قاراستىرىلاتىن قاراجاتتار بار. ودان باسقا "ساەك" باسشىلىعى، جەو باسشىلىعى بار. ولار پاتەردى جوندەۋدى وزدەرىنىڭ جاۋاپكەرشىلىگىنە الادى. ونى ءبىز جەكە قاداعالايمىز"، - دەدى ايان بەيسەكين.
بۇگىندە توتەنشە جاعدايعا ارنالعان قاراجات ەسەبىنەن ەشقانداي تولەمدەر جاسالماعان. سەبەبى كەز-كەلگەن شاعىمدى ەڭ ءبىرىنشى ارنايى كوميسسيا قاراپ، سارالاۋى كەرەك.
"كوميسسيا ءتيىستى شەشىم قابىلداپ، نەگىزدەمەسىن جاساعاننان كەيىن تولەمدەردى تولەيتىن بولادى. زاڭناما اياسىندا جالپى بيۋدجەتتىڭ 1 پايىزى قاراستىرىلۋى ءتيىس. بىزدە جىلدىڭ باسىندا قالا بيۋدجەتىنەن 400 ميلليون تەڭگەگە جۋىق قاراجات قاراستىرىلعان بولاتىن. ءبىراق ول قارجى يگەرىلمەي قالماس ءۇشىن ءبىز باسقا باعدارلامالارعا باعىتتاعانبىز. الدا تاعى ءبىر بيۋدجەتتى ناقتىلاۋ بار. سول كەزدە ورنىن تولتىرامىز. بۇندا ەشبىر ماسەلە جوق"، - دەدى ايان بەيسەكين.
سونداي-اق قالا اكىمى وبلىستىق بيۋدجەتتە دە توتەنشە جاعدايعا ارنالعان قاراجات بار ەكەنىن، قاجەت بولسا وعان دا سۇرانىس جىبەرەتىندەرىن اتاپ ءوتتى. ءبىراق ازىرگە ونداي كولەمدە شىعىن بولادى دەپ كۇتىلىپ وتىرعان جوق.