مارقۇم ارمان دۇيسەنوۆتىڭ ايەلى ايسۇلۋ ايدان قىزى ۇلىنىڭ قازاسى تۋرالى العاش رەت ايتىپ، قاسىم-جومارت توقايەۆقا اشىق ارىز جولدادى، - دەپ حابارلايدى Aqshamnews.kz ءتىلشىسى.
ول بۇل تۋرالى امان تاسىعانعا بەرگەن سۇحباتىندا ءبولىستى. ايسۇلۋدىڭ ايتۋىنشا، 2024 جىلعى 7 قازاندا ونىڭ 21 جاستاعى ۇلى ابىلاي دۇيسەن ءولى تابىلعان.
"ەكى قولى ارتىنا بايلاۋلى ادام وزىنە قول جۇمساۋى مۇمكىن بە؟ تەرگەۋ بارىسىندا كوپتەگەن دەرەك انىقتالدى، ءبىراق ناقتى شەشىم ءالى جوق. بوستاندىق اۋداندىق پوليسياسى دا انىق جاۋاپ بەرە المادى"، – دەيدى ول.
مارقۇمنىڭ اناسى تەرگەۋ كەزىندە ابىلايدىڭ ولىمىنە قاتىستى بىرنەشە ماتەريال تىركەلگەنىن، الايدا ءىستىڭ تولىق اشىلماعانىن ايتادى. 2025 جىلعى 24 قازاندا بوستاندىق اۋداندىق سوتى ايسۇلۋ ايدان قىزى، ونىڭ 13 جاستاعى بالاسى جانە 83 جاستاعى اكەسىن تۇرىپ جاتقان پاتەردەن شىعارۋ تۋرالى قاۋلى شىعارعان.
ونىڭ ايتۋىنشا، پاتەرگە تالاسىپ وتىرعان مۇقاش سانجار (مارقۇم ابىلايدىڭ دوسى - ەسك.) تەرگەۋ كەزىندە بۇل پاتەردى ساتىپ الماعانىن، تەك ابىلايعا قارىز اقشا بەرىپ، پاتەردى كەپىلگە العانىن مويىنداعان. بۇل دەرەك 2024 جىلعى 15 قازان جانە 2025 جىلعى 30 شىلدەدەگى تەرگەۋ سوتىنىڭ قاۋلىلارىندا كورسەتىلگەن.
"سوت ساتىپ الۋ–ساتۋ كەلىسىمشارتىن جارامسىز دەپ تانۋى كەرەك ەدى. ال WhatsApp جازبالارىندا سانجاردىڭ ابىلايعا 65 ميلليون تەڭگەنى وتە جوعارى پايىزبەن قارىزعا بەرگەنى انىق كورىنەدى. سوت شەشىمى زاڭعا قايشى"، – دەدى ايسۇلۋ ايدان قىزى.
ول ءىستىڭ ءادىل قارالۋىنا ىقپال ەتۋىن سۇراپ، مەملەكەت باسشىسىنا اشىق ءوتىنىش جولدادى:
"قۇرمەتتى قاسىم-جومارت كەمەل ۇلى، سوت تورەلىگىنىڭ ءادىل بولۋىنا كومەكتەسۋىڭىزدى وتىنەمىن"، – دەپ اياقتادى كومپوزيتوردىڭ جارى.
ەسكە سالايىق، قايتىس بولعان ارمان دۇيسەنوۆتىڭ ۇلىنىڭ ولىمىنە قاتىستى قىلمىستىق ءىس بىلتىر قازاندا قوزعالعان بولاتىن.