اقش پەن قىتايدىڭ جەتەكشىلەرى ۋكراينادا يادرولىق قارۋدى قولدانۋعا قارسى بولدى
اقش پرەزيدەنتى دجو بايدەن مەن جۇڭگو ءتوراعاسى سي سزينپين يندونەزياداعى بالي ارالىندا وتكەن كەزدەسۋدە باسقا ماسەلەلەرمەن قاتار رەسەيدىڭ ۋكرايناعا قارسى سوعىسىن تالقىلادى جانە وسى قاقتىعىستا يادرولىق قارۋدى قولدانۋعا قارسى بولدى، دەپ حابارلايدى Almaty-akshamy.kz Svoboda.org سىلتەمە جاساپ.
اق ءۇي تاراتقان اقپارات بويىنشا، رەسەيدىڭ ۋكرايناعا باسىپ كىرۋى تاقىرىبىن اقش پرەزيدەنتى بايدەن كوتەرگەن.
«پرەزيدەنت بايدەن مەن سي سزينپين يادرولىق سوعىس ەشقاشان باستالماۋى كەرەك جانە ونى جەڭۋگە بولمايتىنى تۋرالى كەلىسىمدەرىن قۋاتتادى جانە ۋكراينادا يادرولىق قارۋدى قولدانۋ نەمەسە قولدانۋ قاۋپىنە قارسى ەكەنىن اتاپ ءوتتى»، - دەلىنگەن حابارلامادا.
ۋكراينادا يادرولىق قارۋ جوق، سول سەبەپتەن ەكى ەل جەتەكشىلەرى ءوز مالىمدەمەلەرىن ەڭ الدىمەن رەسەيگە ارنادى.
كەزدەسۋ بارىسىندا بايدەن جۇڭگو بيلىگىنىڭ شىڭجاڭ، تيبەت جانە گونكونگتاعى ادام قۇقىقتارىن ساقتاۋ ماسەلەسىن، سونداي-اق امەريكا قۇراما شتاتتارىنىڭ تايۆان ماسەلەسى بويىنشا كەز كەلگەن تاراپتىڭ ستاتۋس-كۆونى بۇزۋىنا قارسى ەكەنىن اتاپ وتكەن.
سي سزينپين كەزدەسۋ الدىندا ەكى ەل ەكىجاقتى قارىم-قاتىناستاردى دامىتۋدا «دۇرىس باعىتتى» تابۋى قاجەتتىگىن ايتقان، سەبەبى مۇنى كۇللى الەم كۇتىپ وتىر.
بايدەن كەلىسسوزدەردەن كەيىن وتكەن باسپا ءسوز ءماسليحاتى بارىسىندا سيمەن وتكەن كەلىسسوز اشىق بولعانىن ايتتى. ول تاراپتار كەڭ اۋقىمدى تاقىرىپتاردى تالقىلاۋدى جالعاستىرۋعا كەلىستى دەپ اتاپ ءوتتى. سونداي-اق، بايدەننىڭ ايتۋىنشا، ول قىتايدىڭ تايۆانعا جاقىن ارادا باسىپ كىرۋگە دايىندالىپ جاتقانىن كورسەتەتىن ەشقانداي بەلگىلەردى كورمەگەنىن جانە الەم جاڭا قىرعي-قاباق سوعىستى بولدىرمايتىنىن اتاپ ءوتتى.
بۇل بايدەن بيلىككە كەلگەننەن بەرى ەكى كوشباسشىنىڭ ءبىرىنشى بەتپە-بەت كەزدەسۋى بولدى. ول جيىرمالىق (G20) توبىنىڭ جىل سايىنعى ءسامميتى الدىندا ءوتتى. سەيسەنبى كۇنى يندونەزيادا الەمنىڭ ەڭ ءىرى 20 ەكونوميكاسى باسشىلارىنىڭ كەزدەسۋى رەسمي تۇردە باستالادى.