ەلىمىزدىڭ ازاماتتارىنا بىرنەشە جەردە جۇمىس ىستەۋگە تىيىم سالىنادى دەگەن اقپارات كوپشىلىكتىڭ نارازىلىعىن تۋعىزدى. نارازىلىققا سەبەپ – ق ر ەڭبەك كودەكسىنىڭ كەيبىر نورمالارىن ازاماتتاردىڭ دۇرىس تۇسىنبەۋىن تۋىندادى. Aqshamnews.kz ءتىلشىسى قازاقستاندىقتار ءبىر مەزگىلدە بىرنەشە جەردە جۇمىس ىستەي الا ما دەگەن سۇراقتىڭ جاۋابىن ناقتىلاۋ ءۇشىن ق ر ەڭبەك جانە حالىقتى الەۋمەتتىك قورعاۋ مينيسترلىگىنە حابارلاستى.
«ق ر ەڭبەك كودەكسىنە سايكەس، جۇمىسكەر بىرنەشە جەردە جانە ءارتۇرلى جۇمىس بەرۋشىدە ەڭبەك ەتۋگە قۇقىلى. بۇل جەردە ەسكەرەتىن جاي، جۇمىس ۋاقىتى تاۋلىك ىشىندە 12 ساعاتتان اسپاۋى ءتيىس. مىسالى، قازىرگى تاڭدا ميديسينا قىزمەتكەرلەرى اراسىندا كۇنىنە 6 ساعاتتان 2 ۇيىمدا جۇمىس ىستەۋ تاجىريبەسى كەڭ تارالاعن، ال تازالىق جۇمىستارى بويىنشا ماماندار 3 ءتۇرلى جۇمىس بەرۋشىگە 4 ساعاتتان قىزمەت كورسەتە الادى. قىزمەت سالاسىنىڭ ەرەكشەلىكتەرىنە بايلانىستى بۋحگالتەرلەر، سانتەحنيكتەر، ەلەكتريكتەر، كۇزەتشىلەر، باعدارلاما جاساۋشىلار، پەداگوگتار، جۋرناليستەر جانە وزگە دە ماماندىق يەلەرىنىڭ 2-3 جۇمىس ورنىندا قاتار ەڭبەك ەتەتىنى ءجيى كەزدەسەدى. اتاپ ايتۋ كەرەك، 18 جاسقا تولماعاندارعا، سونداي-اق اۋىر، زياندى، ءقاۋىپتى ەڭبەك جاعدايىندا ەڭبەك ەتەتىن جۇمىسكەرلەرگە قوسىمشا جۇمىسقا ورنالاسۋعا رۇقسات ەتىلمەيدى. سونىمەن قاتار ق ر مەملەكەتتىك قىزمەت تۋرالى زاڭىنا سايكەس، مەملەكەتتىك قىزمەتشىلەرگە قوسىمشا جۇمىس ىستەۋگە تىيىم سالىنادى. ويتكەنى ولار پەداگوگيكالىق، عىلىمي، شىعارماشىلىق قىزمەتتەن باسقا اقىلى قىزمەتپەن اينالىسۋعا قۇقىلى ەمەس. جوعارىدا كورسەتىلگەن شەكتەۋلەرگە جاتپايتىن، كامەلەتكە تولعان كەز كەلگەن ق ر ازاماتى قوسىمشا جۇمىس ىستەۋگە قۇقىلى.»، - دەدى ق ر ەحاقم ەڭبەك ينسپەكسياسى كوميتەتى ءتوراعاسىنىڭ ورىنباسارى ەربولات ابۋلحاتين.