ۇكىمەت باسشىسىنىڭ ءبىرىنشى ورىنباسارى رومان سكليار قازاقستان اۋە كومپانيالارى مۇگەدەك جاندارعا قانداي جەڭىلدىك ۇسىناتىنىن ايتتى، دەپ حابارلايدى Almaty-akshamy.kz.
«قازىرگى ۋاقىتتا قازاقستان رەسپۋبليكاسىنىڭ قولدانىستاعى زاڭناماسىندا 2 جاستان 15 جاسقا دەيىنگى ىشكى رەيستەردە جانە 2 جاستان 12 جاسقا دەيىنگى حالىقارالىق رەيستەردە كامەلەتكە تولماعان بالالارعا 50% جەڭىلدىك كوزدەلگەن. سونداي-اق 2 جاسقا دەيىنگى بالالاردى حالىقارالىق جانە ىشكى رەيستەردە جەكە ورىن بەرمەي تاسىمالداۋ تەگىن جۇزەگە اسىرىلادى»، - دەپ اتاپ ءوتتى رومان سكليار ءماجىلىس دەپۋتاتتارىنىڭ ساۋالىنا بەرگەن جاۋابىندا.
مينيسترلىكتىڭ سۇراۋىنا وراي، اۋە كومپانيالارى كەلەسىدەي جاۋاپ قايتارعان:
SCAT: اۆياكومپانيانىڭ ىشكى تۇراقتى رەيستەرىندە (سۋبسيديالانعان رەيستەردى قوسپاعاندا) جىلىنا 1 رەت مۇگەدەك بالالار مەن ءى توپتاعى مۇگەدەكتەر ءۇشىن تاريفتەن 100% جەڭىلدىك، سونداي-اق ءىى توپتاعى مۇگەدەكتەر ءۇشىن 50% جەڭىلدىك بەرىلەدى. بۇل رەتتە جولاۋشىلار اۋەجاي الىمدارى مەن اۆيابيلەتتى رەسىمدەگەنى ءۇشىن الىمداردى تولەيدى. ەرىپ جۇرەتىن ادامدارعا جەڭىلدىكتەر قاراستىرىلماعان.
Qazaq Air: مۇگەدەكتىگى بار ادامدارعا اۋە ساپارلارىنا جەڭىلدىكتەر بەرۋ ماسەلەسى بارلىق راستايتىن قۇجاتتاردى ۇسىنعان كەزدە جەكە تارتىپپەن قارالادى. سونىمەن قاتار مۇگەدەك بالاعا تاريف قۇنىنان 100% جەڭىلدىك جانە ىلەسىپ جۇرەتىن ادامعا سول تاريفتەن 50% جەڭىلدىك بەرىلەدى.
Air Astana: 60 جاستان اسقان جولاۋشىلارعا، 12 جاستان 25 جاسقا دەيىنگى جاستارعا جانە ۇوس ارداگەرلەرىنە جەڭىلدىكتەر كوزدەلگەن.