پيراميداعا تارتىلعان قاراجات سوماسى 718 ملن تەڭگەدەن استام
ەلوردادا ەكى بىردەي قارجى پيراميداسىن ۇيىمداستىرعان ايىپتىلارعا قاتىستى سوت ۇكىمى شىقتى، دەپ حابارلايدى Almaty-akshamy.kz استانا قالالىق سوتىنا سىلتەمە جاساپ.
«2023 جىلعى 2 ناۋرىزدا استانا قالاسى سارىارقا اۋدانىنىڭ №2 اۋداندىق سوتى MMK Investment جانە Eden Life7 قارجى پيراميدالارىن ۇيىمداستىرۋ فاكتىسى بويىنشا ت. جانە س-عا قاتىسى ايىپتاۋ ۇكىمىن شىعاردى. ولار 2020 جىلعى قاراشادان 2022 جىلعى قاڭتار ايى ارالىعىندا ءوزارا ءسوز بايلاسۋ ارقىلى قارجى پيراميدالارىنا باسشىلىق ەتكەن. ت. مەن س. WhatsApp جانە Telegram ارقىلى ينۆەستيسيالىق باعدارلامالار تۋرالى جالعان اقپارات تاراتىپ، الەۋەتتى سالىمشىلاردى كومپانيالارعا اقشا قۇيۋعا شاقىرىپ كەلگەن. پيراميداعا تارتىلعان قاراجات سوماسى 718 ملن تەڭگەدەن استام جانە 691 مىڭ اقش دوللارىن قۇرادى»، - دەلىنگەن سوتتىڭ حابارلاماسىندا.
سالدارىنان 34 ادام 164 ملن تەڭگەدەن استام سوماعا زارداپ شەككەن.
پروكۋرور ت. جانە س-نى 8 جىلعا باس بوستاندىعىنان ايىرۋ جازاسىن تاعايىنداۋدى سۇرادى.
«ءوز كەزەگىندە ايىپتىلار كىنالارىن مويىندامادى. ولاردىڭ قورعاۋشىسى قىلمىستىق ءىستى توقتاتۋدى نەمەسە باس بوستاندىعىنان ايىرۋدان باسقا جازا تاعايىنداۋدى سۇرادى»، - دەيدى سوتتان.
ال جابىرلەنۋشىلەر كىنالىلەردى باس بوستاندىعىنان ايىرا وتىرىپ، كەلتىرىلگەن زالالدى ءوندىرۋدى تالاپ ەتكەن.
اقپاراتتا ايتىلعانداي، ت. جانە س. كىناسى جابىرلەنۋشىلەر مەن كۋاگەرلەردىڭ ايعاقتارىمەن، ەكونوميكالىق ساراپتامالار جانە ىسكە قاتىستى باسقا ماتەريالدار ارقىلى دالەلدەنگەن.
«قىلمىستىڭ كودەكستىڭ 217-بابىنىڭ 3-تارماعىنىڭ 2) تارماقشاسىنىڭ سانكسياسى كىنالىلەردىڭ مۇلكىن تاركىلەپ، 5 جىلدان 12 جىلعا دەيىنگى مەرزىمگە باس بوستاندىعىنان ايىرۋ جازاسىن كوزدەيدى. جەڭىلدەتەتىن جانە اۋىرلاتاتىن جاعدايلار جوق. وسىلايشا ت. 6 جىلعا باس بوستاندىعىنان ايىرىلدى. س. 65 جاستا ەكەندىگى مەن دەنساۋلىق جاعدايىن ەسكەرە وتىرىپ، 5 جىلعا باس بوستاندىعىنان ايىرىلدى. سوتتالعاندار قارجى ۇيىمدارىندا 7 جىل مەرزىمگە دەيىن باسشى لاۋازىمىن اتقارۋ قۇقىعىنان ايىرىلدى»، - دەپ جازىلعان سوت شەشىمىندە.
سونداي-اق، سوت اقپارىندا جەكەلەگەن جابىرلەنۋشىلەردىڭ زالالدى ءوندىرىپ الۋ تۋرالى تالابىنىڭ قاناعاتتاندىرىلعانى جانە ءبىر بولىگى ازاماتتىق سوت ءىسىن جۇرگىزۋ تارتىبىمەن جۇگىنۋ قۇقىعىنا سايكەس قاراۋسىز قالعانى ايتىلعان.
ۇكىم زاڭدى كۇشىنە ەنگەن جوق.
ەسكە سالساق، بىلتىر شىلدەدە استانادا «Eden Life» قارجى پيراميداسىن قۇرۋعا قاتىستى قىلمىستىق ءىس قوزعالعان ەدى.
ودان بولەك، قارجىلىق مونيتورينگ اگەنتتىگىنەن ەلوردادا MMK Investment قارجى پيراميداسىن ۇيىمداستىرعان كۇدىكتىنىڭ قاماۋعا الىنعانى حابارلاندى.