قاڭتار ايىنداعى ۇبت باستالعاننان بەرى 53 مىڭنان استام ادام تەست تاپسىردى.
ونىڭ ىشىندە تالاپكەرلەردىڭ 73،6 پايىزى قازاق تىلىندە، 26،3 پروسەنتى ورىس تىلىندە، 35 ادام اعىلشىن تىلىندە تەستىلەۋدەن ءوتتى، اlmaty-akshamy.kz.
ۇبت باستالعالى شەكتى بالدى 73%-عا جۋىق تالاپكەر جينادى. ورتاشا بالعا كەلەتىن بولساق، ول 65 بالدى قۇرادى. ەڭ جوعارى بالل – 134.
تەستكە قاتىسۋشىلاردىڭ باسىم بولىگى «ماتەماتيكا-فيزيكا» جانە «بيولوگيا-حيميا» كومبيناسيالارىن تاڭداعان. سونداي-اق، توپ-3 قاتارىنا تالاپكەرلەردىڭ 11% تاڭداعان «ماتەماتيكا-ينفورماتيكا» كومبيناسياسى كىردى. ەڭ از تاڭدالعان كومبيناسيا – «حيميا-فيزيكا»، ونى 59 ادام تاپسىرعان.
«بۇگىنگى تاڭدا 63 ەرەجە بۇزۋشىلىق انىقتالعان. ونىڭ ىشىندە 43 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 20 ادام شىعارىلىپ، ولاردىڭ ناتيجەلەرى جويىلدى. بوگدە تۇلعالار انىقتالعان جوق»، - دەپ اتاپ ءوتتى ق ر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا ەكى اپتادا 158 تالاپكەر قاتىسقانىن ايتا كەتكەن ءجون.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى. سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
ايتا كەتۋ كەرەك، 2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.