بۇگىن مەملەكەتتىك ورگانداردىڭ سەرۆەرلىك ورتالىعى ينفراقۇرىلىمىنىڭ ىستەن شىعۋىنا بايلانىستى جەكە مەملەكەتتىك دەرەكتەر بازالارى مەن ەلەكتروندىق ۇكىمەتتىڭ كومپونەنتتەرىن دە قولدانۋ مۇمكىن بولمادى، دەپ حابارلايدى Almaty-akshamy.kz «ۇلتتىق اقپاراتتىق تەحنولوگيالار» اق قوعاممەن بايلانىس باسقارماسىنا سىلتەمە جاساپ.
«قازىرگى ۋاقىتتا eGov.kz پورتالى مەن eGov mobile ءموبيلدى قوسىمشاسى جانە نەگىزگى مەملەكەتتىك دەرەكقورلاردى (جت مدب، زت مدب جانە ت.ب.) قوسا العاندا، «ەلەكتروندىق ۇكىمەت» كومپونەتتەرى قالپىنا كەلتىرىلدى.
«ۇات» اق قىزمەتكەرلەرى «ەلەكتروندىق ۇكىمەت» كومپونەنتتەرى مەن مەملەكەتتىك دەرەكتەر بازالارىنىڭ تولىق فۋنكسيونالىن قالپىنا كەلتىرۋ بويىنشا جۇمىس جۇرگىزىپ جاتىر. سونىمەن قاتار، تەحنيكالىق اقاۋلاردىڭ سەبەپتەرىنە تالداۋ جاسالادى.
ەلەكتروندىق ۇكىمەتتىڭ اقپاراتتىق جۇيەلەرىندەگى كەز كەلگەن اقاۋ اقپاراتتىق قاۋىپسىزدىك ينديسەنتى رەتىندە تىركەلەتىنىن اتاپ ءوتۋ كەرەك. كەشەندى تالداۋ قورىتىندىسى بويىنشا الداعى ۋاقىتتا وسىنداي جاعدايلاردىڭ الدىن الۋ شارالارى قابىلدانادى.
ۋاقىتشا قولايسىزدىقتار ءۇشىن پايدالانۋشىلاردان كەشىرىم سۇرايمىز»، - دەيدى «ۇلتتىق اقپاراتتىق تەحنولوگيالار» اق باسقارما ءتوراعاسى روستيسلاۆ كونياشكين.