پاندەميا ءبىرىنشى كەزەكتە نەنى جاقسارتۋ كەرەكتىگىن كورسەتتى
دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋسپەن كەزدەسۋ بارىسىندا دەنساۋلىق ساقتاۋ سالاسىنداعى ىنتىماقتاستىقتى نىعايتۋ، ونىڭ ىشىندە COVID-19-عا قارسى ءىس-قيمىل، مامانداردى وقىتۋ جانە جاڭا تەحنولوگيالاردى تارتۋ ماسەلەلەرى تالقىلاندى، دەپ حابارلايدى Almaty-akshamy.kz.
كەزدەسۋگە سونداي-اق قازاقستان رەسپۋبليكاسىنىڭ دەنساۋلىق ساقتاۋ ءمينيسترى اجار عينيات تا قاتىستى.
تالقىلاۋ بارىسىندا الماتى قالاسىنداعى ەپيدەميولوگيالىق جاعدايدىڭ تۇراقتى بولىپ قالاتىنى – قالانىڭ «جاسىل ايماقتا» تۇرعانى، كوروناۆيرۋستىق ينفەكسيامەن كۇرەسۋ ءۇشىن قاجەتتى رەسۋرستارمەن قامتاماسىز ەتىلگەنى جانە ددۇ ۇسىنىمدارىن ۇستاناتىنى اتاپ ءوتىلدى. قالا باسشىسى ەربولات دوسايەۆ COVID-19 قالانىڭ دەنساۋلىق ساقتاۋ جۇيەسىندەگى ءالسىز جەرلەردى اشقانىن اتاپ ءوتتى.
«پاندەميا ءبىرىنشى كەزەكتە نەنى جاقسارتۋ كەرەكتىگىن كورسەتتى جانە ءبىز قاجەتتى جۇمىستاردى جۇرگىزۋگە نيەتتىمىز، ونىڭ ىشىندە العاشقى مەديسينالىق-سانيتارلىق كومەكتىڭ (مساك) ىقپالى تۇرعىسىنان كورسەتتى. ءبىز قالاداعى جاعدايدى جاقسارتۋعا نيەتتىمىز. ول ءۇشىن مەديسينالىق مەكەمەلەرگە جوندەۋ جانە جاڭعىرتۋ جۇرگىزۋدى، كادرلىق الەۋەتتى كۇشەيتۋدى جانە ددۇ-نىڭ وزىق پراكتيكالارى مەن ۇسىنىمدارىن ىسكە اسىرۋ الاڭىنا اينالدىرۋدى جوسپارلاۋدامىز. كەلەسى 2-3 جىل قالالىق دەنساۋلىق ساقتاۋ جۇيەسىن رەفورمالاۋ ءۇشىن وتە ماڭىزدى»، - دەدى الماتى اكىمى.
ءوز كەزەگىندە دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس گەبرەيەسۋس قالا باسشىسىن قولدادى، العاشقى مەديسينالىق-سانيتارلىق كومەكتىڭ ماڭىزدىلىعىن اتاپ ءوتتى جانە قازاقستاننىڭ وسى سالاداعى تاجىريبەسىن جوعارى باعالادى (قازاقستان مساك-تىڭ وتانى بولىپ سانالادى، مساك جونىندەگى الماتى دەكلاراسياسى 1978 جىلعى 12 قىركۇيەكتە قابىلداندى، 2015 جىلى الماتىدا مساك جونىندەگى ددۇ-نىڭ ءوفيسى اشىلدى).
«ددۇ الەمگە كوپتەگەن مۇمكىندىكتەر بەرەتىن العاشقى مەديسينالىق-سانيتارلىق كومەك ورتالىعىنا شوعىرلانعان. كەلەسى جىلى نيۋ-يوركتە مەديسينالىق ساقتاندىرۋمەن جالپى قامتۋ بويىنشا جوعارى دەڭگەيدەگى كەزدەسۋ وتەدى. ءبىز قازاقستاننىڭ وزىمىزبەن بىرگە جۇمىس ىستەگەنىن جانە العاشقى مەديسينالىق-سانيتارلىق كومەك اسپەكتىلەرى بويىنشا جەتەكشى ءرول اتقارعانىن قالايمىز»، – دەدى تەدروس گەبرەيەسۋس.
تاراپتار سونداي-اق الماتى اۋماعىندا جۇمىس ىستەيتىن ددۇ-نىڭ مساك جونىندەگى گەوگرافيالىق جاعىنان قاشىق ورنالاسقان وڭىرلىك ءوفيسى اياسىندا ىنتىماقتاستىقتى كۇشەيتۋ تۋرالى ۋاعدالاستى.
قالا باسشىسى الماتىنىڭ دەنساۋلىق ساقتاۋ سالاسىن دامىتۋ ءۇشىن وزىق الەمدىك تاجىريبە مەن ۇزدىك پراكتيكانى پايدالانۋعا اسا مۇددەلى ەكەنىن اتاپ ءوتتى.