بءىز نەگە بىردەن جامان جاعىمىزدى ءھام كەمشىلىكتەرىمىزدى ايتۋعا قۇمارمىز وسى... قيت ەتسە بولدى، الەۋمەتتىك جەلىگە ابايسىزدا سوزدەن سۇرىنگەن شەنەۋنىكتى، قاپەلىمدە اياعىن شالىس باسقان پەندە مەن ويلانباستان قاتەلىك جاساعان جاننىڭ ارەكەتىن اشكەرەلەپ، ەلدىڭ تالقىسىنا سالىپ جاتامىز. نەگە؟ ادام ءبىر بالەگە ادەيى ۇرىنايىن دەمەيدى. دەسەك تە، ەشكىم ءمىنسىز ەمەس. جاعىمدى-جاعىمسىز قاسيەت بارىمىزدە بار. ءبىراق... سونىڭ بارلىعىن ءجون-جوسىقسىز جالپاق جۇرتقا جاريا ەتۋدىڭ قانشالىقتى قاجەتى بار؟..
ءيا، الەۋمەتتىك جەلى بۇگىندە مىقتى اقپارات قۇرا لىنا اينا لدى. جەلدەي جۇيتكىگەن حاباردى اينالاسى 5–10 مينۋتتىڭ ىشىندە-اق الۋ ءقازىر تۇك ەمەس. سونىڭ اسەرىنەن ءبىز قاراۋعا تۇرمايتىن، ماعىناسى تاياز، دانەگى جوق ارزان اقپاراتتار لەگىن ەش كەدەرگىسىز قابىلداي بەرەتىن بولدىق. الايدا، بۇل ءسوزىم الەۋمەتتىك جەلىنى پايداسىز دەگەندى بىلدىرمەيدى. عالامتوردىڭ جاقسى جاقتارى بارشىلىق. كەز كەلگەن اقپاراتتى – اۋديو جانە ۆيدەوجازبانىڭ قولجەتىمدىلىگى، اقپارات ىزدەۋ مەن الماسۋ، قايدا جۇرسەڭ دە بەينەقوڭىراۋ ارقىلى سويلەسۋ سەكىلدى ارتىقشىلىقتارى جەتەرلىك.
الەۋجەلىدە كوڭىلگە ءتۇيىپ، كوكەيگە توقيتىن سۇبەلى دۇنيەلەر وتە كوپ. ماسەلەن، بۇگىندە باسقا جەلىگە قوسىلماسا دا، ۆات س اپتى پايدا لانبايتىن جان جوق. سمارتفوندارعا ارنالعان مەسسەندجەر ۇلكەننىڭ دە، كىشىنىڭ دە تەلەفونىندا بار. WhatsApp ارقىلى تاربيەلىك ءمانى بار قۇندى دۇنيەلەردى كوبىرەك وقيتىنىمىز راس. ال Facebook جەلىسىن ۇلتتىق مۇددە تۇرعىسىنان جازىلاتىن قۇندى دۇنيەلەردى ءبىر دەممەن وقۋدىڭ مۇمكىندىگى مول. وندا سالماقتى وي، سارالى ءسوز ايتاتىن تانىمال تۇلعالار مەن وت اۋىزدى، وراق ءتىلدى اقىنداردىڭ، ءسوز ءقادىرىن بىلەتىن، ءتىلى شۇرايلى جۋرناليست قاۋىمىنىڭ جازبالارىنان ءلاززات الاسىڭ.
سوندىقتان فەيسبۋك وي-پىكىر الماسۋدىڭ تاپتىرماس قۇرالى ەكەنى ەكىباستان. مىنە، بۇل الەۋمەتتىك جەلىنىڭ بىزگە رۋحاني دەم بەرەتىن پايدالى جاقتارى... ءبىرىن ايتىپ، بىرىنە كەتتى دەمەڭىز، ەندى مەن باستاپقى ايتار ويىما ورالايىن...
ءقازىر قولى قالت ەتىپ بوساي قالعان ادام الەۋجەلىنى ءبىر شولىپ شىعادى. بۇل كورىنىستى بارلىق جەردەن بايقاۋعا بولادى. قوعامدىق كولىك، اسحانا، ايالداما، ت.س.س. جالپى، ءوز باسىم، وزگەنىڭ وعاش قىلىعىن، بىرەۋدىڭ ارتىق اڭگىمەسىن تىڭداپ، كورىپ وتىرۋعا ونشا اۋەس ەمەسپىن. سەنسەڭىز، الەۋجەلىدەگى قاپتاعان «اقىلگويلەردىڭ» بىردە-بىرىنىڭ ۆەبينارىنا قاتىسىپ كورمەپپىن، قۇلقىم جوق. وندايعا التىن ۋاقىتىمدى ارناعىم دا كەلمەيدى. ءبىراق اندا-ساندا ۆاتساپپەن بەينەجازبالار كەلگەندە كورۋگە تۋرا كەلدى. شىنىمدى ايت ايىن، بىرىنەن-بىرى وتكەن سوراقى بەينەجازبالاردى قاراپ وتىرىپ، وزگەنىڭ ەمەس، ءوز ۇلتىڭنىڭ مازاققا اينالعان قىلىقتارىنا ءىشىم ۋداي اشيدى. ءقازىر بەتىڭ قىزارىپ، ءجۇزىڭ ۇيالاتىن قانشاما جايتتار بار. اسىرەسە، توي-تومالاقتاعى جاستاردىڭ ەرسى بي قيمىلدارىن، ۇزىن كويلەك كيىپ الىپ، ەتەگىن الاي ءبىر، بۇلاي ءبىر كوتەرە بيلەگەن كەلىنشەكتەردىڭ قىلىقتارىن، ارزان ءسوز، جەڭىل كۇلكىگە قۇرىلعان ازىلدەر مەن اسابالاردىڭ ۇيىمداستىرۋىمەن بولاتىن ىڭعايسىز ويىن تۇرلەرىن كورىپ جاعاڭدى ۇستايسىڭ. سوندا بۇل بەينەجازبالاردان ەل-جۇرت قانداي ونەگە الىپ جاتىر دەيمىن دە... ونى كورگەن جاس بالا كەيىن ءدال سول ەرسى ءبيدى «ە-ە-ە، سولاي بولادى ەكەن» دەپ قايتالاماسىنا كىم كەپىل؟!
ءيا، ءقازىر بارلىعىمىز الەۋمەتتىك جەلىمەن تىعىز بايلانىستامىز. ءبىراق سول بايلانىس قۇرالىن وزگەنىڭ كەمشىلىگىن كورسەتۋگە پايدالاناتىنىمىز وكىنىشتى. ماسەلەن، ءسىز ءوزىڭىز جايىندا جاعىمسىز اقپارات جۇكتەر مە ەدىڭىز؟ جوق، ارينە. اسىلىندە، ءسىز الەۋمەتتىك جەلىگە ءوزىڭىزدىڭ باقىتتى ەكەنىڭىزدى كورسەتەتىن، ادەمى بەينەڭىزدى عانا سالاسىز. تانىس- تامىرلارىڭىزعا ءوزىڭىزدىڭ تولىققاندى ءومىر ءسۇرىپ جاتقانىڭىزدى، شەتەل اسىپ، جەر كورىپ جۇرگەنىڭىزدى كورسەتكىڭىز كەلەدى. جۇرتتىڭ ءسىزدى جاقسى جاعىڭىزدان عانا تانىعانىن قالايسىز. جالپى، كەز كەلگەن ادام وزگەنىڭ كوزىنە باقىتتى كورىنگىسى كەلەتىنى قالىپتى جاعداي عوي... الايدا، ءبىز سول الەۋمەتتىك جەلىنىڭ قولداۋىنسىز-اق باقىتتى بولا الامىز.
اششى بولسا دا شىندىق. ارامىزدا ءوزىن زور، وزگەنى قور سانايتىندار كوپ ءقازىر. ايتپەسە، ولار جامان جاعىمىزدى ءھام كەمشىن تۇستارىمىزدى جاريالاۋعا اسىقپاعان بولار ەدى... ونىڭ ورنىنا ءبىز الەۋمەتتىك جەلىگە كوپكە ۇلگى بولار ءىس تىندىرىپ جۇرگەن ازاماتتاردى، ادەمى ادەبىمەن ەل سۇيسىنتكەن كەلىندەردى، تالانتىمەن تاڭقالدىرعان بالاقايلارىمىز جايىندا كوبىرەك جاريالاساق ءجون بولار ەدى. ويتكەنى، ناعىز تالانتتار حالىق اراسىندا ءجۇر. مىنە، سولارمەن ماقتانايىق! بۇدان بىلاي اعايىننىڭ جامان اتىن شىعاراتىن بەينەجازبالارعا جول بەرمەيىك! ءبىز «جاقىنىڭدى جاتتاي سىيلا، جات جانىڭنان ءتۇڭىلسىن»، «وسەر ەلدىڭ بالاسى ءبىرىن-بىرى باتىر دەيدى...» دەگەن دانا حالىقتىڭ ۇرپاعى ەمەسپىز بە؟! ەندەشە، «جاقسىمىزدى اسىرىپ، جامانىمىزدى جاسىرايىق!». مۇمكىندىگىنشە جاقسى ءسوز ايتۋدان جالىقپايىق! ەگەر ءار ادامنىڭ ويى تازا، نيەتى ءتۇزۋ، جۇرەگى اق بولسا بىزدە ءبارى وڭ بولادى. سەبەبى، جاقسى نارسەنىڭ بارلىعى ءبىزدى جاقسى ويعا جەتەلەيدى. ال جاقسى ويدىڭ شىندىققا اينالاتىنىن ءسىز جاقسى بىلەسىز...
تاقىرىپقا وراي
ويىڭىز تازا بولسا، جولىڭىز اشىق!
ءبىر جولاۋشى ءشول دالادا كوپ كۇن ءجۇرىپ، كەزدەيسوق ءبىر سايالى اعاشقا كەزدەسەدى. اعاشتىڭ جانىنا بارىپ، كولەڭكەسىنە ءبىراز وتىرادى دا، ءشولىن قاندىرۋدى ويلايدى. سول ساتتە ونىڭ الدىندا سۋ قۇيىلعان قۇمىرا پايدا بولادى. جولاۋشى شوشىپ قالادى. ءبىراق قاتتى ءشول شىداتىپ تۇرا ما؟ سۋدى الىپ، ىشەدى. ءشولى قانعان جولاۋشى «ەندى ءبىر تاماقتانىپ السام عوي، شىركىن...» دەپ ويلادى. سالدەن سوڭ الدىنا تاماق تولى ۇستەل پايدا بولادى. تاماققا تويىپ العان جولاۋشىنىڭ دەمالعىسى كەلەدى. دەمدە الدىندا جاتاتىن ورىن پايدا بولادى. كەنەت وعان «مۇنىڭ ءبارىن كىم ىستەپ وتىر، مۇمكىن بۇل ءبىر قۇبىجىق شىعار» دەگەن وي كەلەدى. اپ-ساتتە الدىندا قورقىنىشتى قۇبىجىق تۇرادى. «بۇل مەنى ءولتىرۋى مۇمكىن عوي» دەپ ويلادى جولاۋشى، سول-اق ەكەن، قۇبىجىق ونى ولتىرەدى.
ەندەشە، ويلاعان ويىمىز جاقسى بولسىن. بۇل ويىمىز تازا بولسا، جولىمىز اشىق بولادى دەگەندى بىلدىرەدى!