قۇقىقتىق قورعاۋ ءۇشىن قولايلى جاعدايلار جاساۋعا باعىتتالعان شارالار كەشەنى كوزدەلگەن.
ەۋرازيالىق ۇكىمەتارالىق كەڭەس وتىرىسىندا ەاەو-عا قاتىسۋشى بەس ەلدىڭ مينيسترلەرى ەۋرازيالىق ەكونوميكالىق وداققا مۇشە مەملەكەتتەردىڭ تۇتىنۋشىلاردىڭ قۇقىقتارىن قورعاۋ سالاسىنداعى بىرلەسكەن ءىس-قيمىل باعدارلاماسىن بەكىتتى، دەپ حابارلايدى Almaty-akshamy.kz.
«قۇجاتتى وتكەن جىلدىڭ كوكتەمىندە ەۋرازيالىق ەكونوميكالىق كوميسسيا القاسىنىڭ جانىنان قۇرىلعان جانە وعان مۇشە مەملەكەتتەردىڭ مۇددەلى مەملەكەتتىك ورگاندارى مەن قوعامدىق بىرلەستىكتەرىنىڭ جانە كوميسسيانىڭ وكىلدەرى كىرگەن ارنايى جۇمىس توبى دايىندادى»، - دەلىنگەن ساۋدا جانە ينتەگراسيا مينيسترلىگىنىڭ باسپا ءسوز قىزمەتىنىڭ حابارلاماسىندا.
قۇجاتتا حالىقارالىق قۇقىق نورمالارىن ەسكەرە وتىرىپ، تۇتىنۋشىلاردىڭ قۇقىقتارىن قورعاۋ سالاسىنداعى كەلىسىلگەن ساياساتتىڭ نەگىزگى باعىتتارىن دامىتۋ مەن ىسكە اسىرۋعا جانە مۇشە مەملەكەتتەردىڭ قوعامدىق بىرلەستىكتەرى مەن تۇتىنۋشىلار ۇيىمدارىنىڭ قاتىسۋىمەن ترانسشەكارالىق داۋلاردى شەشۋدى قوسا العاندا، تۇتىنۋشىلاردى كەشەندى قۇقىقتىق قورعاۋ ءۇشىن قولايلى جاعدايلار جاساۋعا باعىتتالعان شارالار كەشەنى كوزدەلگەن.
باعدارلامانىڭ مىندەتتەرىنە تۇتىنۋشىلاردىڭ حاباردارلىعىن ارتتىرۋعا جانە ۇتىمدى جانە تۇراقتى تۇتىنۋ داعدىلارىن قالىپتاستىرۋعا باعىتتالعان بىرلەسكەن ءىس-شارالار وتكىزۋ دە كىرەدى.