بارىمىزگە بەلگىلى، قازىرگى ۋاقىتتا مەملەكەتىمىزدە سيفرلىق پلاتفورمالار كەڭىنەن دامىپ جاتىر. سونىڭ ءبىرى «E-otinish» اقپاراتتىق جۇيەسى. «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ماقساتىندا 2021 جىلدىڭ 1- شىلدەسىنەن باستاپ «E-otinish» اقپاراتتىق جۇيەسى ىسكە قوسىلدى. وسىعان بايلانىستى ازاماتتاردىڭ ارىز-شاعىمىمەن جۇمىس ىستەۋ جۇيەسى دە وزگەردى. ەندى ازاماتتاردان كەلىپ تۇسكەن بىردە-بىر جولدانىم تىركەلۋسىز جانە جاۋاپسىز قالمايدى.
«E-otinish» اقپاراتتىق جۇيەسى جولدانىمداردى مەملەكەتتىك ورگانداردىڭ قۇزىرەتىنە قاراي اۆتوماتتى تۇردە بولەدى جانە ءوتىنىش بەرۋشىنى جولدانىمداردى قاراۋدىڭ بارلىق كەزەڭدەرى مەن مەرزىمدەرى بويىنشا حاباردار ەتەدى جانە دە جولدانىم بەرۋشىمەن كەرى بايلانىس ورناتۋعا، مەملەكەتتىك ورگانداردىڭ جۇمىس ساپاسىن باعالاۋعا مۇمكىندىك بەرەدى.
سونداي-اق، اكىمشىلىك راسىمدىك-پروسەستىك كودەكستىڭ 76-بابىنا جانە 99-بابىنا سايكەس، كەلىپ تۇسكەن ارىز، ءۇن قوسۋ، سۇراۋ، حابار جانە دە ۇسىنىستار 15 جۇمىس كۇننىڭ ىشىندە، ال شاعىم 20 جۇمىس كۇندە قارالىپ جاۋاپ بەرىلۋگە مىندەتتى.
سونىمەن بىرگە، «E-otinish» اقپاراتتىق جۇيەسى ارقىلى بارلىق مەملەكەتتىك ورگاندار وقيعالاردان حاباردار بولىپ، ازاماتتاردىڭ قاجەتتىلىكتەرى مەن تىلەكتەرىنىڭ ناقتى كورىنىسىنە سۇيەنە وتىرىپ، جەدەل باسقارۋ شەشىمدەرىن قابىلداۋعا مۇمكىندىك الدى.
قىزمەتتى پايدالانۋ ءۇشىن ەلەكتروندىق ۇكىمەت پورتالىنا كىرىپ، «E-otinish» اقپاراتتىق جۇيەسىنىڭ باننەرىنە ءوتۋ قاجەت. EGov سەرۆيسىنەن باسقا، «E-otinish» قوسىمشاسى Aitu ءموبيلدى سەرۆيسىندە جانە eGov mobile-دا قولجەتىمدى. سونداي-اق سەرۆيستى حالىققا قىزمەت كورسەتۋ ورتالىعىندا جولدانىمداردى قابىلداۋ ورتالىعىندا پايدالانۋعا بولادى. «E-otinish» اقپاراتتىق جۇيەسى ارقىلى جىبەرىلگەن بارلىق جولدانىمدار ەلەكتروندىق سيفرلىق قولتاڭبامەن راستالۋى ءتيىس.
«E-otinish» اقپاراتتىق جۇيەءسىنىڭ ەرەكشەلىگى سول، ءاربىر ازامات ءوزىنىڭ ءوتىنىشى قايدا، قانداي مەكەمەگە جولدانعانىن، قاي كەزدە قارالعانىن جۇيە ارقىلى قاراپ، باقىلاي الادى.
سونداي-اق، ارىز-شاعىمىنا دەگەن مەملەكەتتىك مەكەمەنىڭ جاۋابىن باعالاۋعا دا مۇمكىندىك بار.
سونىمەن قاتار، جۇيەدە جولدانىم تىركەلگەن ازاماتتارعا SMS-حابارلاما ارقىلى ارىز-شاعىمىنىڭ قارالۋ كەزەڭدەرى تۋرالى حابارلامالار جىبەرىلەدى. ونىڭ قارالۋ تاريحى جۇيەدە ساقتالادى جانە مەملەكەتتىك ورگان بۇرىن قانداي شەءشىم قابىلدانعانىن سارالاي وتىرىپ، اكىمشىلىك ءىس قالىپتاستىرا الادى.
ەگەر، ءوتىنىش يەسى بەرىلگەن جاۋاپپەن كەلىسپەگەن جاعدايدا قازاقستان رەسپۋبليكاسى اكىمشىلىك راسىمدىك-پروسەستىك كودەكسىنىڭ 91-بابىنا سايكەس، جوعارى تۇرعان ورگانعا نەمەسە سوتقا شاعىمدانۋعا قۇقىلى جانە ارەكەتسىزدىك بەلگىلى بولعان كۇننەن باستاپ 3 اي مەرزىمىنەن كەشىكتىرمەي بەرىلۋ قاجەت.
شاعىم جازباشا (قاعاز جانە (نەمەسە) ەلەكتروندىق) نىساندا بەرىلەدى، 20 جۇمىس كۇندە قارالادى. شاعىمدى قارايتىن ورگان شاعىمدى دۇرىس قاراۋ ءۇشىن ماڭىزى بار ناقتى ءمان-جايلاردى جان-جاقتى، تولىق جانە وبەكتيۆتى زەرتتەۋ ءۇشىن شارالار قابىلداۋعا مىندەتتى.