دزيۋدودان ەۋروپا كۋبوگىندە قازاقستان قۇراماسى ەكى مەدال جەڭىپ الدى

جارىسقا 43 ەلدەن 400-گە جۋىق تاتامي شەبەرى قاتىسىپ جاتىر

دزيۋدودان قازاقستان ەرلەر قۇراماسى بولگاريا استاناسى سوفيا قالاسىندا وتكەن ەۋروپا كۋبوگىندە ەكى مەدال جەڭىپ الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستان دزيۋدو فەدەراسياسىنىڭ باسپا ءسوز قىزمەتىنەن ءمالىم ەتكەندەي، اتالمىش جارىسقا 43 ەلدەن 400-گە جۋىق تاتامي شەبەرى قاتىسىپ، ب ا ق سىنادى.

عۇسمان قىرعىزبايەۆ 66 كەلىگە دەيىنگى سالماق دارەجەسىندە فينالعا دەيىن بولگاريا، گەرمانيا، ۇلىبريتانيا جانە يتاليا سپورتشىلارىنان باسىم ءتۇستى.

ال سوڭعى باسەكەدە ۋكراينالىق ميكيتا حولوبورودكومەن تارتىستى كۇرەس 9 مينۋتقا دەيىن جالعاستى.

نەگىزگى ۋاقىتتا تەڭ تۇسكەن سپورتشىلار گولدەن سكوردا (قوسىمشا ۋاقىت) جەڭىمپازدى انىقتادى.

ناتيجەسىندە، وتانداسىمىز قارسىلاسىنا ەسە جىبەرىپ، كۇمىستى ەنشىلەدى.

سونداي-اق 81 كەلىگە دەيىنگى سالماق دارەجەسىندە بەلدەسكەن رۋسلان مۇسايەۆ قولا جۇلدە ءۇشىن كۇرەستە مولدوۆالىق نيكون زابوروششۋكتى جەڭدى.

ايتا كەتەرلىگى، رۋسلان مۇسايەۆ ءوز توبىندا ۇزدىك اتانىپ، جارتىلاي فينالعا دەيىن ەركىن جەتتى.

ەسكە سالا كەتەيىك، بۇدان بۇرىن ءابيبا ءابۋجاقىنوۆانىڭ الەمدىك Grand Slam ءتۋرنيرىنىڭ قولا جۇلدەگەرى اتانعانىن جازعان بولاتىنبىز.

سونداي-اق دانيار شامشايەۆ الەمدىك Grand Slam ءتۋرنيرىنىڭ قولا جۇلدەگەرى اتاندى.