دەنساۋلىق ساقتاۋ ءبىرىنشى ۆيسە-مينيسترى تيمۋر سۇلتانعازييەۆ قازاقستان ازاماتتارى قانداي اۋرۋلاردان ءجيى كوز جۇماتىنىن ايتتى.
ونىڭ ايتۋىنشا، تاماق ءونىمىنىڭ ساپاسى مەن قاۋىپسىزدىگى، ونىڭ حالىقتىڭ دەنساۋلىعىنا اسەرى تۋرالى ماسەلە ءالى وزەكتى، دەپ حابارلايدى aqshamnews.kz
بۇگىندە الەمدەگى سياقتى قازاقستاندا ينفەكسيالىق ەمەس اۋرۋلار بارلىق ءولىمنىڭ 84%-ىنا سەبەپ بولىپ وتىر. دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) مالىمەتىنشە، 4 نەگىزگى اۋرۋ: جۇرەك-قان تامىر اۋرۋلارى، ونكولوگيا، سەمىزدىك، قانت ديابەتى مەزگىلسىز ولىمگە سەبەپ بولۋى مۇمكىندىگىنىڭ 27%-ىنا تەڭ. مۇنداعى تاۋەكەل فاكتورلارىنىڭ ءبىرى – دۇرىس تاماقتانباۋ. قۇرامىنداعى مايى، قانتى جانە تۇزى كوپ تاعامداردى تۇتىنۋدى ينفەكسيالىق ەمەس اۋرۋلاردىڭ كوبەيۋىنە، جۇمىسقا قابىلەتتىلىگىنىڭ جوعالۋىنا جانە دەنساۋلىق ساقتاۋدىڭ ايتارلىقتاي شىعىنىنا اكەلەدى، جالپى ەكونوميكاعا تەرىس اسەرىن تيگىزەدى. ماسەلەن 2022 جىلمەن سالىستىرعاندا قان اينالىمى اعزالارىنىڭ اۋرۋى مەن سىرتقاتتانۋشىلىق كورسەتكىشى 6%-عا، سەمىزدىك 2%-عا، قانت ديابەتى 17%-عا وسكەن، – دەدى تيمۋر سۇلتانعازييەۆ سەناتتاعى ۇكىمەت ساعاتىندا.
ءمينيستردىڭ ورىنباسارى قازاقستاندا تۇزدى تۇتىنۋ كورسەتكىشى جوعارى ەكەنىن اتاپ ءوتتى.
ددسۇ تۇزدى تاۋلىگىنە 5 گرامعا دەيىنگى تۇتىنۋعا كەڭەس بەرەدى. الايدا بۇل كورسەتكىش ەلىمىزدە تاۋلىگىنە 17 گرامعا دەيىن جەتەدى. 6-9 جاس ارالىعىنداعى بالالاردىڭ 17%-دان استامى كۇن سايىن، 50%-دان استامى اپتا سايىن قانت قوسىلعان سۋسىنداردى تۇتىنادى. سالدارىنان 6-9 جاس ارالىعىنداعى بالالاردىڭ 20%-ى نەمەسە ءاربىر بەسىنشى بالانىڭ ارتىق سالماعى بار، ال ونىڭ 7%-ى سەمىزدىك اۋرۋىنا شالدىققان، - دەدى ۆيسە-مينيستر.
تيمۋر سۇلتانعازييەۆ بۇل ماسەلەنى شەشۋ ءۇشىن مينيسترلىك نە ىستەپ جاتقانىن جەتكىزدى.
«حالىقتىڭ ترانسمايلاردى، تۇزدى شامادان تىس پايدالانۋدى ازايتۋ جونىندەگى ءىس-شارالاردى كوزدەيتىن ينفەكسيالىق ەمەس اۋرۋلاردىڭ الدىن الۋ بويىنشا مينيسترلىك جول كارتاسىن ىسكە اسىرىپ جاتىر. مەكتەپتەردە، كوللەدجەردە جانە جوعارى وقۋ ورىندارىندا ءتاتتى سودا، سەرگىتەتىن سۋسىندار، فاست-فۋد، چيپستەردى ساتۋعا تىيىم سالىندى. دەنساۋلىقتىق ساقتاۋدى دامىتۋ تۇجىرىمداماسىن ىسكە اسىرۋ شەڭبەرىندە قۇرامىندا قانت قوسىلعان سۋسىندارعا سالىق ەنگىزۋ ماسەلەسى پىسىقتالۋدا. 2025 جىلدان باستاپ 21 جاسقا تولماعان ادامدارعا سونداي-اق ساۋدا اۆتوماتتارى ارقىلى ەنەرگەتيكالىق سۋسىندارعا تىيىم سالىنادى»، – دەدى ءمينيستردىڭ ورىنباسارى.