الەمدە ەڭ تانىمال سۋسىن - شايدىڭ ءوز مەرەكەسى بار.
يۋنەسكو شاتب پاتەرىندە بيىل بۇل مەرەكە وسىمەن ەكىنشى رەت ۇيىمداستىرىلىپ وتىر. شاراعا ءبىزدىڭ ەلىمىز العاش رەت قاتىستى، دەپ حابارلايدى Almaty-akshamy.kz.
24.kz تاراتقان اقپاراتقا ساي، دۇنيەجۇزىندە ءار سەكۋند سايىن 130 كەلى شاي وندىرىلەدى. شايعا دەگەن سۇرانىس جىل سايىن ارتىپ كەلەدى. كوپ ەلدىڭ سالت-داستۇرىمەن ۇشتاسقان شاي مادەنيەتى ءبىر جىل بۇرىن ادامزاتتىڭ ماتەريالدى ەمەس مۇراسى دەپ تانىلدى. سودان بەرى يۋنەسكو شتاب-پاتەرىندە شاي كۇنى اتالىپ وتەدى.
«ەۋروپادا شاي مادەنيەتى كەنجە قالعان دەسە بولادى. مۇندا ادامدار شايدى كوبىنە تەك اۋىرعان كەزدە ىشەدى. جاي ۋاقىتتا ونى دەمدەپ، ءدامى مەن حوش يىسىنەن راحات الۋ سياقتى ءداستۇر جوق. ءبىز وسىنى وزگەرتكىمىز كەلەدى»، - دەيدى يۋنەسكو قوعامى قاۋىمداستىعىنىڭ پرەزيدەنتى ماريەتتا بانچيەۆ.
حالىقارالىق ۇيىم قابىرعاسىندا وتكەن شاراعا نەگىزىنەن جۇڭگو كامەلياسىن وسىرەتىن ەلدەردىڭ وكىلدەرى جينالدى. دۇنيەجۇزىندە شايدى كوپ وندىرەتىن دە وسى مەملەكەتتەر. سولاردىڭ ءبىرى - كەنيا. بۇل ەلدىڭ تۇرعىندارى جايعا جان سىيلايتىن سۋسىندا ءسۇت قاتىپ ىشكەندى ۇناتادى.
«كەنيادا كەز كەلگەن ۇيگە قوناققا بارساڭىز سىزگە ەڭ الدىمەن شايعا شاقىرادى. جەرگىلىكتى تىلدە كاريبۋ شاي دەيدى»، - دەيدى يۋنەسكو-داعى كەنيا تۇراقتى وكىلىنىڭ ورىنباسارى ەۆا ماينا.
سەيلوندا كوبىنە جوعارى سۇرىپتى شاي وندىرۋگە دەن قويىلعان. وسى سەبەپتى وندىرىستىك القاپتاردان الىناتىن ونىمنەن كورى جەكە شارۋاشىلىقتاردىڭ سۇرىپى جوعارى باعالانادى. الەمدە دە وسى ءۇردىس كۇشەيىپ كەلەدى.
«بۇل شاراپ سياقتى. ءتپتى ونى ءبىر ەرەكشە ونەر دەپ قاراستىرۋعا بولادى. مىسالى شري-لانكادا ولار قانداي بيىك جوتادا وسىرىلگەنىنە قاراي ەرەكشەلەنەدى. شاراپ سياقتى شايدىڭ ءدامىن تاتۋشى ارنايى ماماندار بار»، - دەيدى يۋنەسكو-داعى شري-لانكانىڭ تۇراقتى وكىلى مانيشا گۋناسەكەرا.
الەمدە ءىرى شاي وندىرۋشىلەردىڭ اراسىنا يندونەزيانى جاتقىزۋعا بولادى. مۇندا اسىرەسە قارا شاي قۇندى. ال قازاقستان بۇگىنگى سالتاناتتى شاراعا العاش رەت قاتىسىپ وتىر. ءبىزدىڭ ەلدە ول وندىرىلمەگەنمەن، حالىقتىڭ ەڭ كوپ ىشەتىن سۋسىنى سانالادى.