تۇركيانىڭ يزنيك قالاسىندا ءوتىپ جاتقان دۇنيەجۇزىلىك كوشپەندىلەر ويىندارىندا بۇگىن قازاقستاندىقتار كوكپار مەن جامبى اتۋدان سايىسقا تۇسەدى، دەپ حابارلايدى Almaty-akshamy.kz Inform.kz-كە سىلتەمە جاساپ.
كوكپاردان ەل قۇراماسى بۇگىن موڭعوليامەن سايىسقا تۇسەدى. قازاقستاندىق كوكپارشىلار بۇدان بۇرىن وزبەكستاننان 8:1 ەسەبىمەن باسىم تۇسكەن بولاتىن.
سونداي-اق، ەل قۇراماسى ساپىنان سپورتشىلار جامبى اتۋدان (ات ۇستىندە ساداق اتۋ) جۇلدەلەردى ساراپقا سالادى.
سپورتتىڭ اتالعان تۇرىنەن ەل نامىسىن ەرالحان ايكوز، ابزال تۇلىبەكوۆ، باقداۋلەت باباجان قورعاپ جاتىر.
«سايىس 3 ستيل بويىنشا وتكىزىلەدى. ونىڭ 2ء-ى تۇرىك، 1ء-ى ۆەنگر ءادىسى بويىنشا وتۋدە. جارىستىڭ ەكىنشى كۇنىندە قاباق اتۋ (تۇرىك ءادىسى) بويىنشا قازاقستاندىق سپورتشى كۇمىس جۇلدەگە (كىشى مەدال) يە بولدى. الەمنىڭ 21 ەلىنەن كەلگەن 75 سپورتشى اراسىندا جامبى اتۋدان تۇڭعىش الەم چەمپيونى ەرالحان ايكوز قارسىلاسىنا ءسال عانا ايىرماشىلىقپەن ەسە جىبەردى»، - دەپ ءمالىم ەتتى ۇلتتىق سپورت تۇرلەرى ورتالىعىنان.