دۇنيەجۇزىلىك كوشپەندىلەر ويىندارىندا ساداق اتۋشىلار وتاندىق ءونىمدى پايدالانادى

استانادا وتەتىن 5ء-شى دۇنيەجۇزىلىك كوشپەندىلەر ويىندارىنا ساناۋلى كۇن قالدى.

بۇگىنگى تاڭدا ۇلتتىق قۇراما سپورتشىلارشىلارى انىقتالىپ، قاتىسۋشىلاردىڭ بارلىعى دەرلىك ءدۇبىرلى دوداعا ساقاداي ساي، دەپ حابارلايدى aqshamnews.kz.

ءداستۇرلى ساداق اتۋدان ۇلتتىق قۇراما باس باپكەرى دياس احمەتوۆتىڭ ايتۋىنشا، ساداق اتۋ سپورت ءتۇرى بويىنشا ەلىمىزگە 35 مەملەكەتتەن 200-دەن اسا سپورتشى كەلەدى.

«ءبىزدىڭ ساداق اتۋشىلارعا تۇركيا، قىرعىستان، موڭعوليانىڭ مەرگەندەرى باسەكە تۋدىرارى انىق. فرانسيا، يتاليا، يسپانيا، جۇڭگو، تايلاند، يراننان كەلەتىن سپورتشىلار دا وتە مىقتى. دەگەنمەن، ءبىزدىڭ سپورتشىلار دا وسال ەمەس. جۇلدەدەن ءۇمىتتىمىز»، - دەيدى باس باپكەر دياس احمەتوۆ.

«وسى ۋاقىتقا دەيىن ۇلتتىق قۇراما قۇرال-جابدىقتاردىڭ باسىم بولىگىن تۇركيا، ماجارستان، رەسەيدەن تاپسىرىس بەرىپ الدىرتاتىن. كەيىنگى جىلدارى ەلىمىزدەگى ءوندىرىس تە جولعا قويىلا باستادى. الداعى كوشپەندىلەر ويىنىنا وتاندىق ءونىم «التىن جەبە» اتتى سەحتىڭ شىعارعان وقتارىن قولدانامىز. سول ءۇشىن حالىقارالىق ستاندارتتارعا ساي جاسالعان 2000-نان اسا وق دايىنداپ قويدىق»، - دەيدى ءداستۇرلى ساداق اتۋدان ۇلتتىق قۇراما مۇشەسى ەربول تاپەنوۆ.

- ءداستۇرلى ساداق اتۋدان 5ء-شى دۇنيەجۇزىلىك كوشپەندىلەر ويىندارىندا ەل نامىسىن 10 سپورتشى قورعايدى. ۇلتتىق قۇرامانىڭ مۇشەلەرى دە دايىندىق بارىسىندا وتاندىق ءونىمدى پايدالانىپ، جاتتىعۋلارىن پىسىقتاپ جاتىر،- دەپ مالىمدەدى «ۇلتتىق جانە ات سپورتى تۇرلەرى ورتالىعىنىڭ» باسپا ءسوز قىزمەتى.