دۇنيەجۇزىلىك كوشپەندىلەر ويىندارى يۋنەسكو مۇرالارىنىڭ تىزىمىنە ەنگىزىلدى

 بۇل –  جاھاندانۋ ءۇردىسى كەزىندە وزىندىك تاريحي دارالىقتى ساقتاپ قالۋ مۇمكىندىگى

يۋنەسكو ۇيىمى بيىل الەمنىڭ تۇكپىر-تۇكپىرىنەن 59 نوميناسيانى جاريالاعان ەدى. دۇنيەجۇزىلىك كوشپەندىلەر ويىندارىن ۇسىنعان قىرعىزستان بۇل ساناتتا ءبىرىنشى تۇردى، دەپ حابارلايدى Almaty-akshamy.kz

مامانداردىڭ ايتۋىنشا، جارىستار كوشپەلى حالىقتىڭ ۇلتتىق سپورت داستۇرلەرىنە قىزىعۋشىلىعىن جاڭعىرتا تۇسكەن. سول سەبەپتى دە يۋنەسكو تىزىمىنە ەنگىزىلدى.

«بۇل – ماڭىزدى وقيعا. ارينە، دۇنيەجۇزىلىك مادەني مۇرا رەتىندە يۋنەسكو تىزىمىنە ەنسەك، قۋانا-قۋانا ءوز ۇلەسىمىزدى قوسامىز. بۇل – ءبىز ءۇشىن ۇلكەن ابىروي. ويتكەنى داستۇرلەردى ساقتاپ، ونى ۇرپاقتان-ۇرپاققا سول قالپىندا جەتكىزۋ – ۇلكەن مىندەت»، - دەيدى ۆولونتەر ايناش اناربەكوۆا.

كوشپەلى حالىقتاردىڭ ۇلتتىق سپورت جارىستارىن وتكىزۋ ۇسىنىسى قازاقستان، قىرعىزستان، ازەربايجان جانە تۇركيا پرەزيدەنتتەرى قاتىسقان 2012 جىلى وتكەن تۇركى تىلدەس ەلدەردىڭ سامميتىندە قولداۋ تاپقان ەدى. ەكى جىلدان كەيىن ىستىقكول جاعالاۋىندا العاشقى دۇنيەجۇزىلىك كوشپەندىلەر ويىندارى ءوتتى. قازاقستاندىق سپورتشىلار بۇل جارىستاردا ءارقاشان كوش باسىنان كورىنىپ كەلەدى.