داۋلەت تۇرلىحانوۆتىڭ ۇلى باس بوستاندىعىنان ايىرىلۋى مۇمكىن
بۇگىن الماتى گارنيزونىنىڭ اسكەري سوتىندا دەپۋتات تۇرلىحانوۆتىڭ بالاسى نۇراسىل بولاتتى ءىسى بويىنشا العاشقى تىڭداۋلار ءوتتى، دەپ حابارلايدى Almaty-akshamy.kz
ول ادۆوكات ولەگ چەرنوۆ پەن ونىڭ جۇبايى اننانىڭ دەنساۋلىعىنا قاساقانا ورتاشا زيان كەلتىردى دەپ ايىپتالۋدا. وقيعا قىستا بولعان ەدى، بىرنەشە ايعا سوزىلعان تەرگەۋگە نۇكتە قويىلاتىن بولدى.
مەملەكەتتىك ايىپتاۋشى تۇرلىحانوۆتىڭ ۇلىن قىلمىس جاساعانى ءۇشىن كىنالى دەپ تانۋدى جانە وعان ءبىر جارىم جىل باس بوستاندىعىن شەكتەۋ تۇرىندەگى جازا بەلگىلەۋدى سۇرادى. مۇنداي ارەكەت ءۇشىن (قىلمىستىق كودەكستىڭ 107-بابى 2-بولىگىنىڭ 1 جانە 5-تارماقتارى) 3 جىلعا دەيىنگى مەرزىمگە باس بوستاندىعىنان ايىرۋ كوزدەلگەن.
جابىرلەنۋشىلەر تۇرلىحانوۆتىڭ ۇلى ءۇشىن ءدال وسىنداي جازانى سۇراعان. سۋديا ديحان الياسقاروۆ قانداي شەشىم قابىلدايتىنى دۇيسەنبى كۇنى بەلگىلى بولماق. سول كۇنى ۇكىم جاريالانادى.