اراب امىرلىكتەرىندە قازاقستان سۋرەتشىسى، ديزاينەر ءلايلا جارقىن شىعارمالارىنىڭ كورمەسى ءوتتى.
ەلىمىزدىڭ دۋبايداعى كونسۋلدىعىنىڭ قولداۋىمەن ۇيىمداستىرىلعان مادەني ءىس-شاراعا وسى مەملەكەتتە جۇرگەن وتانداستارىمىز، قالا تۇرعىندارى مەن قوناقتارى جينالدى. كەلۋشىلەر كيىزدەن جاسالعان بۇيىمداردى تاماشالاپ، قازاق ونەرىنىڭ قۇدىرەتىنە تاعى ءبىر مارتە تاڭعالىستى، دەپ حابارلايدى اlmaty-akshamy.kz.
«تۋعان جەر» اتاۋىمەن وتكەن كورمەدە كاسىبي سۋرەتشى ءلايلا جارقىن ونعا جۋىق كيىز تەكەمەت پەن قولونەر بۇيىمدارىن تانىستىردى. 18 جاسىنان بەرى كيىز باسۋ ونەرىن تاڭداعان سۋرەتشى ۇمىتىلىپ بارا جاتقان ۇلتتىق قولونەردى دارىپتەپ، ونى جاڭعىرتۋعا بەل بۋعان.
ءلايلا جارقىن، قازاقستان سۋرەتشىلەر وداعىنىڭ مۇشەسى: - ءبىزدىڭ ونەردى تانىتۋ، تەك قانا قازاقستاندىقتارعا عانا ەمەس، الەمگە تانىتۋ. قازىرگى ءوسىپ كەلە جاتقان ۇرپاقتىڭ وسى ونەرگە جاقىنداعانىن قالايمىن جانە وسىنداي ءبىزدىڭ بار بايلىعىمىزبەن الەممەن بولىسكىم كەلەدى.
كورمەنى تاماشالاۋعا كەلگەندەردى شەبەر شىعارمالارىنىڭ مازمۇنى عانا ەمەس، كيىزدى دايىنداۋ تەحنيكاسىنىڭ ەرەكشەلىگى دە قىزىقتىردى. تابيعي تازا ماتەريالدان جاسالعان سىرماق، تەكەمەت، تۇسكيىز، تاقيا سەكىلدى ونىمدەر ۇلكەن سۇرانىسقا يە. كيىز بۇگىندە سۋرەتشىلەر، ديزاينەرلەر، قولونەر شەبەرلەرىنىڭ وي-قيالىنداعى سۇلۋلىقتى جەتكىزەتىن باستى قۇرالىنىڭ بىرىنە اينالعان.
ادەمى تۇستەرگە بويالىپ، شۇيكەلەنىپ قويعان جاباعى ءجۇندى وسىلاي يكەمدەپ، قالاعان دۇنيەنى جاساپ الۋعا بولادى. شەبەردىڭ ايتۋىنشا كيىز باسۋ وتكەن زامانداعىداي تىم كۇردەلى ەمەس. كەرىسىنشە، كەز كەلگەن ادام تەز ۇيرەنىپ الاتىن كاسىپ.
دينارا شاحمەتوۆا، "Nomad" مادەني ورتالىعىنىڭ جەتەكشىسى: - ءبىزدىڭ مادەني قۇندىلىقتارىمىزدى جاڭعىرتۋ. شەتەلدە جۇرگەننەن كەيىن ءسالت-داستۇرىمىزدى ۇمىتپاۋ ءۇشىن ءبىز وسىنداي شارالاردى ۇيىمداستىرىپ جاتىرمىز. دۋبايدا تۇراتىن قىتايلىق قانداسىمىز راۋشانگۇل ءازيز شەبەر ۇيىمداستىرعان قولونەر ساباعىنا قىزىن ەرتە كەلگەن. اناسىنان ۇيرەنگەنىن ۇرپاعى دا جالعاستىرعانىن قالايدى.
راۋشانگۇل ءازيز، تۇرعىن: - كىشكەنە كەزىمىزدە باساتىنبىز جايلاۋدا. اكەم مەن اعالارىم كيىزدى يلەپ قولىمەنەن، ىستىق سۋدان بىلەكتەرى قىپ-قىزىل بولىپ شىعاتىن. بالالىق شاعىما كەتىپ قالعانداي بولىپ، شەشەمنىڭ، اجەمنىڭ جانىندا جۇرگەندەي كۇي كەشىپ تۇرمىن.
ماقتانىپ ايتا المايمىن اجەممەن بىرگە ىستەدىم دەپ، ءقازىر راحاتتانىپ ىستەپ وتىرمىن، كەرەمەت ەكەن، شابىت تا كەلەدى، دەنەم تىتىركەنىپ كەرەمەت سەزىمدەمىن.
قىسقا ۋاقىتتىڭ ىشىندە كيىزدەن كوز تارتار كوركەم دۇنيەلەر جاسالدى. قولونەر شەبەرى ءلايلا جارقىننىڭ دىتتەگەن ماقساتى دا وسى – كيىز باسۋدىڭ جەڭىل ءادىسىن ۇيرەتۋ ارقىلى اتا-بابامىزدان كەلە جاتقان اسىل مۇرانى ماڭگىگە ساقتاپ قالۋ.