دسم ەلدەگى تۇماۋ ەپيدەمياسى تۋرالى حابارلادى

قازاقستانعا تۇماۋعا قارسى 2 ميلليون 280 مىڭنان استام دوزا ۆاكسينا اكەلىنگەن.

قازاقستاندا دەنساۋلىق ساقتاۋ مينيسترلىگىنىڭ مالىمەتى بويىنشا، 2،1 ميلليوننان استام ادام ءجىتى رەسپيراتورلىق ۆيرۋستىق ينفەكسيا (جرۆي) مەن تۇماۋمەن اۋىرعانى تىركەلدى، دەپ حابارلايدى Almaty-akshamy.kz

دەنساۋلىق ساقتاۋ ءمينيسترىنىڭ ورىنباسارى ۆياچەسلاۆ دۋدنيك قازاقستاندا ءجىتى رەسپيراتورلىق ۆيرۋستىق ينفەكسيالار مەن تۇماۋمەن سىرقاتتانۋشىلىقتىڭ ماۋسىمدىق كۇرت ءوسۋى بايقالىپ وتىرعانىن، بۇل وتكەن جىلدىڭ سايكەس كەزەڭىمەن سالىستىرعاندا ايتارلىقتاي جوعارى ەكەنىن ايتتى. مۇنداي جاعداي ەپيدەميا بولىپ سانالادى.

«ەپيدەميا باستالعاننان بەرى، ياعني 1 قازاننان بەرى سانيتارلىق قىزمەتتىڭ مالىمەتىنشە، 2 ميلليون 100 مىڭنان استام ءجىتى رەسپيراتورلىق ۆيرۋستىق ينفەكسيا تىركەلدى. ونىڭ ىشىندە 14 جاسقا دەيىنگى بالالار اراسىندا - 1 ميلليون 370 مىڭ ادام بار. ءبىز قوزدىرعىشقا زەرتتەۋ جۇرگىزدىك. «ۆ» توبىنىڭ ۆيرۋسى بارلىق وبلىستا بايقالدى. ال سۋىق تيۋ اۋرۋىنىڭ ءوسۋى بىلتىرعىعا قاراعاندا ورتا ەسەپپەن 10% جوعارى»، - دەدى دەنساۋلىق ساقتاۋ ءمينيسترىنىڭ ورىنباسارى ۆياچەسلاۆ دۋدنيك.

سونىمەن قاتار ول پروفيلاكتيكالىق ماقساتتا قازاقستانعا تۇماۋعا قارسى 2 ميلليون 280 مىڭنان استام دوزا ۆاكسينا اكەلىنگەنىن، ءقازىردىڭ وزىندە 2،5 ميلليون ادام نەمەسە ەل حالقىنىڭ 12%-ى ەكپە العانىن ايتتى.

21 جەلتوقساندا دەنساۋلىق ساقتاۋ ءمينيسترى اجار عينيات قازاقستاندا شوشقا تۇماۋىنىڭ تارالىپ جاتقانىن مالىمدەدى.