الماتى اكىمى دارحان ساتىبالدى اباي داڭعىلىنان ءال-فارابي داڭعىلىنا دەيىنگى دوستىق داڭعىلى ۋچاسكەسىندەگى كەشەندى اباتتاندىرۋ جۇمىستارىنىڭ بارىسىمەن تانىستى.
جوبا جايلى قوعامدىق كەڭىستىكتى قالىپتاستىرۋعا باعىتتالعان. مۇندا تروتۋارلار جاڭارتىلىپ، سكۆەر سالىنادى، سپورت الاڭدارى مەن شاعىن ساۋلەتتىك پىشىندەر ورناتىلادى. سونداي-اق، كوگالداندىرۋ، جاياۋ جۇرگىنشىلەر ايماعىن كەڭەيتۋ جانە رەتتەلگەن اۆتوتۇراقتاردى ۇيىمداستىرۋ كوزدەلگەن.
بۇعان دەيىن بۇل ۋچاسكەدە تروتۋارلار تار جانە بىركەلكى بولعان، اۆتوتۇراقتار رەتسىز قويىلىپ، جاسىل ايماقتار كۇتىمسىز قالعان، ۆەلوسيپەد ينفراقۇرىلىمى بولماعان. مامانداردىڭ ايتۋىنشا، بۇل اۋماقتى جاڭاشا ويلاستىرىپ، كەشەندى جاڭعىرتۋ قاجەت بولعان.
جۇمىس 4،18 گەكتار اۋماقتى قامتيدى، قايتا جاڭعىرتىلاتىن ۋچاسكەنىڭ ۇزىندىعى 1،5 كم. جوبانى «الماتىباسجوسپار» عىلىمي-زەرتتەۋ ينستيتۋتى ازىرلەگەن جانە مەملەكەتتىك ساراپتامانىڭ وڭ قورىتىندىسىن العان.
دارحان ساتىبالدى جۇمىس ساپارىنىڭ سوڭىندا مەرزىم مەن جوبالىق ستاندارتتاردىڭ ساقتالۋىن قامتاماسىز ەتۋدى تاپسىردى. ول الماتى كوشەلەرى قالا تۇرعىندارى مەن قوناقتارى ءۇشىن تازا، زاماناۋي جانە ىڭعايلى بولۋى كەرەك ەكەنىن اتاپ ءوتتى.
داڭعىلدى اباتتاندىرۋ قالالىق ورتانىڭ ساپاسىن ارتتىرۋعا، ءقاۋىپسىز جانە زاماناۋي ينفراقۇرىلىم قۇرۋعا، قالا تۇرعىندارىنىڭ جايلىلىعىن ارتتىرۋعا باعىتتالعان.